काठमाडौं । काठमाडौंको जमलस्थित टप दरबार रोधी क्लबले भदौ ५ देखि ७ गतेसम्म तीनदिने ‘लोकदोहोरी मेला’ आयोजना गर्ने भएको छ।

नेपाली मौलिक कला, संस्कृति, लोकसंगीत तथा रोधी परम्पराको संरक्षण, संवर्द्धन र प्रवर्द्धन गर्ने उद्देश्यले मेला आयोजना गर्न लागिएको क्लबले जनाएको छ।

मेलामा राजु परियार, बद्री पंगेनी, प्रकाश सपूत, दुर्गेश थापा, प्रेमराजा महत, पुरुषोत्तम न्यौपाने, कृष्ण कँडेल, अर्जुन सापकोटा, पशुपति शर्मा, चन्द्र शर्मा, प्रकाश दुतराज, राजु ढकाल, देवी घर्ती, ज्योति मगर, प्रीति आले, वसन्त थापा, प्रियंका कार्की र एलिना चौहानलगायत कलाकारले प्रस्तुति दिनेछन्।

क्लबसँग नियमित रूपमा आबद्ध करिब ६० जना कलाकारको समेत मेलामा विशेष प्रस्तुति रहने पत्रकार सम्मेलनमार्फत जानकारी दिइएको छ।

सात करोड रुपैयाँ लगानीमा सञ्चालनमा आएको टप दरबार रोधी क्लबमा एकपटकमा करिब २०० जना अट्ने क्षमता रहेको सञ्चालक अशोक गिरीले बताए। उनका अनुसार क्लबले प्रत्यक्ष रूपमा १०० भन्दा बढीलाई रोजगारी दिएको छ।

Originally published on abcnews.com.np.