काठमाडौं । नेपाल इन्जिनियर्स एसोसिएसनको ३५औँ केन्द्रीय, नेपाल इन्जिनियरिङ परिषद् तथा चौथो प्रादेशिक कार्यकारिणी समितिको निर्वाचन प्रक्रिया निष्पक्ष, समावेशी र पारदर्शी बनाउन सरोकारवालाले संयुक्त अपिल गरेका छन्।

संयुक्त अपिलमा एसोसिएसनमा कुल सदस्य संख्या करिब ४६ हजार रहेको उल्लेख गर्दै हाल करिब १४ हजार २९४ सदस्य मात्र कायम देखिएको भन्दै आपत्ति जनाइएको छ। यसअनुसार करिब ३२ हजार सदस्य निर्वाचन प्रक्रियाबाट बाहिरिने अवस्था देखिएको उनीहरूको दाबी छ।

ठूलो संख्यामा सदस्यलाई निर्वाचनबाट बाहिर राखेर गरिने निर्वाचनले उचित र समावेशी प्रतिनिधित्व सुनिश्चित गर्न नसक्ने उनीहरूले बताएका छन्।

सदस्यता र मतदाता नामावलीमा प्रश्न

अपिलकर्ताहरूले निर्वाचनको मिति, कार्यक्रम तथा कार्यतालिका, सदस्यता व्यवस्थापन र मतदाता नामावलीजस्ता विषयमा सम्बन्धित सरोकारवालासँग पर्याप्त र औपचारिक परामर्श गर्न माग गरेका छन्।

सदस्यता प्रक्रिया साउन १७ गतेदेखि रोकिएको भए पनि सोही समयमा सम्बन्धित पक्षसँग आवश्यक परामर्श हुन नसकेको उनीहरूको भनाइ छ। अन्तिम सदस्यता विवरण सार्वजनिक तथा प्रमाणीकरण हुनुपर्ने अवस्थामा त्यसो हुन नसक्नु निर्वाचन प्रक्रियाको गम्भीर त्रुटि भएको उनीहरूले बताएका छन्।

उनीहरूले सबै सरोकारवालाको सुझाव र निष्पक्ष अध्ययनपछि निर्वाचन कार्यतालिकामा पुनः परामर्श गरी त्यसलाई समयअनुकूल, व्यावहारिक, समावेशी र सर्वस्वीकार्य बनाउन माग गरेका छन्।

निर्वाचन समितिमा प्रतिनिधित्व माग

संयुक्त अपिलमा निर्वाचन समितिमा सम्बन्धित सरोकारवालाको प्रतिनिधित्व सुनिश्चित गरी समयमै समिति गठन गर्नसमेत माग गरिएको छ।

निर्वाचनको मुख्य आधार नै सदस्यता विवरण भएकाले सदस्यताको तथ्यांकमा पारदर्शिता कायम नगरी निर्वाचन प्रक्रिया अघि बढाउनु उचित नहुने उनीहरूको तर्क छ।

अपिलकर्ताहरूले आफ्ना माग कुनै पक्ष वा समूहको समर्थन अथवा विरोधमा नभएको स्पष्ट पारेका छन्। निष्पक्ष, समावेशी, पारदर्शी, विश्वसनीय र सर्वस्वीकार्य निर्वाचन सुनिश्चित गर्नु नै आफूहरूको उद्देश्य रहेको उनीहरूको भनाइ छ।

Originally published on abcnews.com.np.