काठमाडौं । नेपाल राष्ट्र बैंकका नवनियुक्त डेपुटी गभर्नर दीर्घबहादुर रावलले बिहीबार पद तथा गोपनीयताको शपथ लिएका छन्। गभर्नर प्रा. डा. विश्वनाथ पौडेलसमक्ष शपथ लिएलगत्तै रावलले पदभारसमेत ग्रहण गरेका छन्।

मन्त्रिपरिषद्को भदौ ३ गतेको निर्णयअनुसार रावललाई डेपुटी गभर्नरमा नियुक्त गरिएको हो। शपथग्रहण समारोहमा गभर्नर पौडेलले रावललाई बधाई दिँदै सफल कार्यकालको शुभकामना दिए।

रावलले २०६२ माघ २ गते सहायक निर्देशकका रूपमा नेपाल राष्ट्र बैंकको सेवामा प्रवेश गरेका थिए। त्यसपछि २०६९ मा उपनिर्देशक, २०७५ मा निर्देशक र २०८२ जेठ १९ गते कार्यकारी निर्देशकमा पदोन्नति भएका थिए।

कार्यकारी निर्देशकमा पदोन्नति भएपछि रावलले बैंक सुपरिवेक्षण विभागको नेतृत्व सम्हाल्दै आएका थिए। करिब दुई दशकदेखि राष्ट्र बैंकमा कार्यरत रावलले बैंकिङ क्षेत्रका विभिन्न विषयमा अनुभव हासिल गरेका छन्।

Originally published on abcnews.com.np.