काठमाडौं । नवगठित जय नेपाल पार्टीले संगठन विस्तारदेखि आगामी स्थानीय तहको निर्वाचनको तयारीसम्मका १० वटा महत्वपूर्ण निर्णय गरेको छ।

पार्टी अध्यक्ष डा. धवलशम्शेर राणाको अध्यक्षतामा बिहीबार बसेको केन्द्रीय समितिको पहिलो बैठकले भदौ र असोजभित्र ७७ वटै जिल्लामा जिल्ला तदर्थ समिति गठन गर्ने निर्णय गरेको हो। त्यसका लागि केन्द्रीय सदस्यहरू सम्मिलित टोली परिचालन गरिने पार्टीले जनाएको छ।

जय नेपाल पार्टीले गत साउन २९ गते निर्वाचन आयोगमा दर्ताका लागि निवेदन दिएको थियो।

स्थानीय निर्वाचनको तयारी

बैठकले आगामी स्थानीय तहको निर्वाचनलाई लक्षित गर्दै तयारी अघि बढाउने निर्णय गरेको छ। स्थानीय तहमा उम्मेदवार बन्न इच्छुक योग्य तथा लोकप्रिय नागरिकलाई सम्पर्कमा आउन पार्टीले आह्वान गरेको छ।

यस्तै, भदौ महिनाभित्र युवा, महिला तथा जेन–जीसहितका जनवर्गीय संगठन, विभाग तथा समितिहरू केन्द्रीय तहमा गठन गर्ने निर्णय गरिएको छ।

संविधान संशोधनमा जनमतको माग

बैठकले संविधान निर्माणका क्रममा देशभरबाट प्राप्त जनसुझाव बेवास्ता गरिएको आरोप लगाउँदै ती सुझावको पुनःमूल्यांकन गर्नुपर्ने निष्कर्ष निकालेको छ।

जनताको अभिमत सम्बोधन हुने गरी संविधान संशोधन गर्न सरकारमाथि आवश्यक दबाब सिर्जना गर्ने निर्णय पनि बैठकले गरेको छ।

त्यसैगरी, संवैधानिक राजसंस्था र हिन्दू अधिराज्यको पक्षमा जनमत निर्माण गर्दै सम्बन्धित निकायमा दबाब सिर्जना गर्ने उद्देश्यले देशव्यापी हस्ताक्षर अभियान सञ्चालन गर्ने निर्णय गरिएको छ।

गौसंरक्षणका लागि दबाबमूलक कार्यक्रम

बैठकले राष्ट्रिय जनावर गाईको संरक्षणलाई राष्ट्रिय दायित्वका रूपमा अघि बढाउने निर्णय गरेको छ।

गौहत्या गैरकानुनी भए पनि विभिन्न स्थानमा गाई हत्या तथा गाईको मासु बिक्री–वितरण हुने गरेको भन्दै त्यसलाई रोक्न राज्य तथा सम्बन्धित निकायमाथि दबाब सिर्जना गर्ने निर्णय गरिएको छ। यसका लागि भदौ महिनामा दबाबमूलक कार्यक्रम सञ्चालन गर्ने तथा सातवटै प्रदेशमा सुविधासम्पन्न गौशाला निर्माणका लागि जनमत सिर्जना गर्ने पार्टीले जनाएको छ।

अनलाइन सदस्यता र प्रवासी नेपालीको मताधिकार

पार्टीले भदौभित्रै अनलाइनमार्फत सदस्यता लिन सकिने गरी विद्युतीय प्रणाली निर्माण गर्ने निर्णय गरेको छ। प्रशिक्षण सञ्चालनका लागि आवश्यक सामग्री तयार गर्न कार्यदल गठन गर्ने निर्णय पनि गरिएको छ।

‘एक पटकको नेपाली, सधैँको नेपाली’ भन्ने मान्यताअनुसार प्रवासमा रहेका नेपाली नागरिकलाई मताधिकार उपलब्ध गराउन सरकारमाथि दबाब सिर्जना गर्ने निर्णयसमेत बैठकले गरेको छ।

विचार मिल्ने शक्तिसँग एकताको पहल

जय नेपाल पार्टीसँग विचार र उद्देश्य मिल्ने राजनीतिक दल, संगठन, समूह, अभियान तथा व्यक्तिहरूलाई एकताबद्ध गर्न वार्ता समिति गठन गरिने भएको छ।

यस्तै, पार्टीका नीति, विचार र लक्ष्यलाई आधार बनाएर स्थिर तथा समुन्नत नेपाल निर्माणको मार्गचित्र तयार गर्न कार्यदल गठन गर्ने निर्णय गरिएको छ। त्यस क्रममा स्वदेश तथा विदेशमा रहेका विभिन्न विषयका विज्ञ नेपालीबाट सुझाव तथा परामर्श लिइने पार्टीले जनाएको छ।

Originally published on abcnews.com.np.