भदौ २ गते बिहान करिब ७ बजे हेमकुमारी आले च्याउ टिप्न घरनजिकैको शंखदेवी सामुदायिक वनतर्फ गएकी थिइन्। उनलाई नाती शिवान पनि पछिपछि जंगलतर्फ गएको थाहा भएन।

घरबाट केही टाढा पुगेपछि शिवानका हजुरबुवाले ‘बाबु कता जान्छौ?’ भनेर सोधेका थिए। तर शिवानले कुनै जवाफ नदिई हजुरआमालाई पछ्याउँदै अघि बढेका थिए।

हेमकुमारी च्याउ टिपेर घर फर्किएपछि नाती घरमा नभएको थाहा पाइन्। त्यसपछि परिवार र स्थानीयवासीले खोजी सुरु गरेका थिए। बालक नभेटिएपछि प्रहरीलाई खबर गरिएको थियो।

इलाका प्रहरी कार्यालय गैँडाकोटले नजिकका प्रहरी इकाई तथा सशस्त्र प्रहरीलाई समेत परिचालन गरेको थियो। प्रहरीका करिब ५० जना र स्थानीयवासी गरी झण्डै २५० जनाको टोली जंगलमा खोजीमा खटिएको थियो। भदौ २ गते राति ८ बजेसम्म टर्चलाइटको सहायताले खोजी गरिए पनि बालक फेला परेनन्।

भदौ ३ गते पनि खोजीलाई निरन्तरता दिइएको थियो। प्रहरी, सशस्त्र प्रहरी र स्थानीयवासीले जंगलका विभिन्न क्षेत्रमा खोजी गरेका थिए।

भागर खोला नजिकै रुँदै गरेको अवस्थामा भेटिए

भदौ ४ गते बिहान करिब १० बजे शंखदेवी सामुदायिक वनअन्तर्गत भागर खोलानजिकको कोप्चेरोमा शिवानलाई रुँदै गरेको अवस्थामा फेला पारिएको हो।

फेला परेपछि बालकलाई तत्काल अस्पताल लगिएको थियो। चिकित्सकले शरीरका विभिन्न भागमा सामान्य चोट देखिए पनि स्वास्थ्य अवस्था सामान्य रहेको बताएका छन्।

इलाका प्रहरी कार्यालय गैँडाकोटका इन्चार्ज प्रहरी निरीक्षक लक्ष्मण गिरीले शिवानलाई भेटेर स्वास्थ्य अवस्था सामान्य रहेको जानकारी दिए।

दुई दिनसम्मको खोजीपछि बालक सकुशल फेला परेपछि परिवार र खोजीमा खटिएका स्थानीयवासी तथा सुरक्षाकर्मीले राहत महसुस गरेका छन्।

प्रहरीले बालबालिकालाई घरबाहिर लैजाँदा तथा उनीहरू वरपर हुँदा विशेष निगरानी राख्न अभिभावकलाई आग्रह गरेको छ।