पोखरा । पोखरा उद्योग वाणिज्य संघको आसन्न ७२औँ अधिवेशन तथा ३६औँ महाधिवेशनमा सदस्य पदका १० उम्मेदवारले साझा रूपमा निर्वाचनमा जाने निर्णय गरेका छन्।

अध्यक्षका उम्मेदवारहरूले छुट्टाछुट्टै प्यानल बनाउने तयारी गरिरहेका बेला सदस्य पदका १० आकांक्षी भने एक भएर अघि बढ्ने भएका हुन्।

‘अध्यक्षहरूको प्यानल भएन। हामी सदस्यहरू भने एक भएर जाने भएका छौँ। पछि कसलाई समर्थन गर्ने भन्ने सोचौँला, तर अहिलेका लागि हामी एक भएर हिँडेका हौँ,’ सदस्य पदका एक उम्मेदवारले भने।

उनका अनुसार सदस्य पदमा १० जना निर्वाचित हुने व्यवस्था रहेकामा ८ जना यसअघिको कार्यसमितिमा रहेका र २ जना नयाँ उम्मेदवार रहेका छन्।

सदस्य पदमा अमृत पोखरेल, सूर्यराज घिमिरे (सुरेश), दुर्गा बराल, नवीन नापित, मनोहरि पौडेल, राम कँडेल, दुधमान गुरुङ (आशिष), कमलबहादुर सुनार, एकनारायण गौतम र भानुभक्त अधिकारी संयुक्त रूपमा निर्वाचनमा जाने भएका छन्।

उम्मेदवारहरूले जारी गरेको विज्ञप्तिमा आम पोखरेली उद्योगी–व्यवसायीको चाहनाअनुसार महाधिवेशनमा सदस्य पदका उम्मेदवारहरू एक भएर अध्यक्ष तथा पदाधिकारीका साझा उम्मेदवारका रूपमा प्रतिस्पर्धा गर्ने निर्णय गरिएको उल्लेख छ।

साझा घोषणापत्र र एजेन्डा बनाउने

निर्वाचन जित्नेमात्र नभई पोखरा उद्योग वाणिज्य संघलाई थप बलियो, एकताबद्ध र प्रभावकारी संस्था बनाउने उद्देश्यले निर्वाचनपछि पनि आपसी सहकार्यलाई निरन्तरता दिने उनीहरूले बताएका छन्।

उनीहरूले निर्वाचनका लागि साझा घोषणापत्र र एउटै एजेन्डा तयार गरी संघका सदस्यहरूसँग प्रत्यक्ष भेटघाट तथा अन्तरक्रिया गर्ने निर्णयसमेत गरेका छन्।

यस्तो छ निर्वाचन तालिका

पोखरा उद्योग वाणिज्य संघको निर्वाचन तालिकाअनुसार भदौ ५ गते उम्मेदवारको मनोनयनपत्र वितरण हुनेछ भने भदौ ८ गते मनोनयनपत्र दाखिला गरिनेछ। सोही दिन उम्मेदवारको नामावली प्रकाशन गरिनेछ।

भदौ २० र २१ गते ३६औँ महाधिवेशन सम्पन्न हुनेछ।

सन् २०११ सालमा अमृतप्रसाद शेरचनको अध्यक्षतामा स्थापना भएको पोखरा उद्योग वाणिज्य संघमा हाल २ हजार ७३१ सदस्य आबद्ध छन्।

Originally published on abcnews.com.np.