पोखरा । प्रधानन्यायाधीश डा. मनोजकुमार शर्मा आज पोखरा आउँदै हुनुहुन्छ। उहाँले पोखरासहित पर्वत, बागलुङ र म्याग्दीस्थित अदालतहरूको निरीक्षण गर्ने कार्यक्रम रहेको छ।

प्रधानन्यायाधीश शर्मा बिहान ९ बजे पोखरा आइपुग्ने कार्यक्रम छ। पोखरा आएलगत्तै उहाँलाई उच्च अदालत पोखरामा स्वागत गरिनेछ। त्यसपछि उहाँले कास्की जिल्ला अदालतको निरीक्षण गर्नुहुनेछ।

उच्च अदालत बार इकाई पोखराका अनुसार प्रधानन्यायाधीश शर्माले आजै पर्वत, बागलुङ र म्याग्दीका जिल्ला अदालतको समेत निरीक्षण गर्नुहुनेछ। उहाँ आज पोखरामै बस्नुहुने कार्यक्रम रहेको छ।

अदालतको कार्यसम्पादनबारे जानकारी लिने

निरीक्षणका क्रममा अदालतहरूको कार्यसम्पादन, न्याय सम्पादनको अवस्था, सेवा प्रवाह तथा देखिएका समस्याबारे जानकारी लिने बताइएको छ।

प्रधानन्यायाधीशको भ्रमणमा उच्च अदालत पोखरासहित विभिन्न जिल्ला अदालतको निरीक्षण समेटिएको छ। भ्रमणलाई अदालतको कार्यशैली र न्याय वितरण प्रक्रियाको अवस्थाबारे प्रत्यक्ष जानकारी लिने अवसरका रूपमा हेरिएको छ।

Originally published on abcnews.com.np.