काठमाडौँ । नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’की छोरी तथा स्वकीय सचिव गङ्गा दाहालले आफ्नो परिवारमाथि लगाइएका आर्थिक आरोपको खण्डन गरेकी छन् ।

सामाजिक सञ्जालमार्फत स्पष्टीकरण दिँदै दाहालले आफू र आफ्नो परिवारविरुद्ध नियोजित रूपमा अफवाह फैलाइएको दाबी गरेकी हुन् ।

विगतमा ‘दुबईमा ४० अर्ब रहेको’ तथा ‘भाटभटेनीलगायत ठूला व्यापारिक घरानासँग साँठगाँठ रहेको’ आरोप लगाइएको उल्लेख गर्दै उनले ती आरोप पुष्टि हुन नसकेपछि अहिले फेरि ‘५० करोडको हावादारी हल्ला’ चलाइएको बताएकी छन् ।

दाहालले अफवाह फैलाउनेहरूलाई आरोप पुष्टि गर्न सार्वजनिक चुनौतीसमेत दिएकी छन् । ‘राजनीतिक प्रतिशोध र विरोधी बन्नुको पनि सीमा हुन्छ होला ! कुनै पनि आरोप पुष्टि नभएपछि अहिले बजारमा ५० करोडको हावादारी हल्ला चलाउन खोजिएको रहेछ,’ उनले लेखेकी छन्, ‘म सार्वजनिक रूपमा चुनौती दिन चाहन्छु, अफवाह फैलाउनेहरूले यसको पुष्टि गर्न सक्छन् ?’

आफू र आफ्नो परिवार जुनसुकै कानुनी छानबिनका लागि तयार रहेको दाहालले बताएकी छन् । उनले परिवारले केही समयअघि नै सरकारसमक्ष सम्पत्ति विवरण बुझाइसकेको दाबी गर्दै सरकारले गर्ने अनुसन्धानमा पूर्ण सहयोग गर्ने बताएकी छन् ।

‘गलत गरेको पुष्टि भए कारबाही भोग्नेछौँ,’ उनले भनेकी छन् ।

आफ्नो बाल्यकाल क्रान्ति र असामान्य परिस्थितिमा बितेको उल्लेख गर्दै दाहालले जनतालाई धोका दिनुभन्दा मृत्यु स्वीकार गर्ने आफ्नो ‘स्कुलिङ’ रहेको दाबी गरेकी छन् ।

‘हामी मृत्युको मुखबाट बाँचेर आएका हौँ । हामीलाई के गर्न हुन्छ, के गर्न हुँदैन, राम्रोसँग थाहा छ,’ उनले भनेकी छन्, ‘हामी मृत्युवरण गर्छौँ तर जनतालाई धोका दिन सक्दैनौँ, यही नै हाम्रो स्कुलिङ हो ।’

छोरीको नाताले बुवालाई सहयोग गर्नुलाई अपराधका रूपमा चित्रण नगर्न पनि उनले आग्रह गरेकी छन् । बेला–बेलामा आफू र आफ्नो परिवारलाई लक्षित गरी यस्ता आरोप तथा अफवाह किन र कुन उद्देश्यले फैलाइन्छ भन्ने विषयमा उनले सरकारको गम्भीर ध्यानाकर्षण गराएकी छन् ।

अनुसन्धानमा सहयोग गर्ने प्रतिबद्धता

दाहालले परिवारको सम्पत्ति विवरण सरकारलाई बुझाइसकेको बताउँदै आवश्यक परे जुनसुकै निकायबाट हुने छानबिनमा सहयोग गर्ने प्रतिबद्धता जनाएकी छन् । कुनै गलत काम प्रमाणित भए कानुनअनुसार कारबाही भोग्न तयार रहेको उनको भनाइ छ ।

Originally published on abcnews.com.np.