कञ्चनपुर । कञ्चनपुरस्थित महाकाली प्रादेशिक अस्पतालमा आवश्यक जनशक्ति, शय्या र उपकरणको अभाव हुँदा मिर्गौला रोगीले सहज रूपमा डायलाइसिस सेवा पाउन सकेका छैनन् । बिरामीको चाप बढ्दै गए पनि उपलब्ध स्रोतसाधन पर्याप्त नहुँदा नियमित उपचारका लागि पालो कुर्नुपर्ने अवस्था रहेको अस्पतालले जनाएको छ ।

मिर्गौला रोगीले सामान्यतया हप्तामा दुई पटकसम्म डायलाइसिस गर्नुपर्ने हुन्छ । तर, अस्पतालमा बिरामीको चापअनुसार आवश्यक जनशक्ति र उपकरण नहुँदा सेवा सञ्चालनमा समस्या भइरहेको महाकाली प्रादेशिक अस्पतालका प्रमुख मेडिकल सुपरिटेन्डेन्ट जगदीश जोशीले बताए ।

‘हामीसँग चार जना स्टाफ नर्स भए भोलिदेखि नै रातिको सिफ्टमा समेत डायलाइसिस सेवा सञ्चालन गर्न सक्छौँ,’ जोशीले भने, ‘अहिले कार्यरत जनशक्तिसमेत पर्याप्त छैन । उपकरण छन्, बिरामीको चाप छ ।’

अस्पतालले हाल दुई सिफ्टमा डायलाइसिस सेवा सञ्चालन गरिरहेको छ । तर, शय्या अभावका कारण करिब २५ जना बिरामीसम्म पालो कुरेर बस्नुपर्ने अवस्था रहेको मेसु जोशीले बताए ।

‘अहिले १० वटा बेड उपलब्ध छन्, नौ वटा सञ्चालनमा छन् । एउटा मेसिन इमर्जेन्सीका लागि ब्याकअपमा राख्नुपर्ने हुन्छ,’ उनले भने, ‘आवश्यक उपकरण र जनशक्ति अभाव हुँदा सहज रूपमा सेवा दिन सकिएको छैन ।’

महाकाली अस्पतालमा दैनिक करिब २५ जना बिरामी डायलाइसिसका लागि आउने गरेका छन् । सेवा लिन आउने बिरामीको संख्या बढ्दै गए पनि आवश्यक शय्या, उपकरण र जनशक्ति थप हुन नसक्दा उपचार व्यवस्थापन चुनौतीपूर्ण बनेको अस्पतालको भनाइ छ ।

शय्या थपेर मात्रै समस्या समाधान नहुने

सुदूरपश्चिम प्रदेशका नवनियुक्त मुख्यमन्त्री खगराज भट्टले पदभार ग्रहण गर्दै प्रदेशका अस्पतालमा डायलाइसिस शय्या थप गरी मिर्गौला रोगीको उपचारमा पहुँच बढाउने निर्णय गरेका छन् ।

तर, महाकाली प्रादेशिक अस्पताल प्रशासनले शय्या थपेर मात्र डायलाइसिस सेवाको समस्या समाधान नहुने जनाएको छ । शय्यासँगै पर्याप्त जनशक्ति र उपकरणको व्यवस्था गर्नुपर्ने अस्पतालको भनाइ छ ।

अस्पतालमा डायलाइसिसका लागि आउने बिरामीको संख्या निरन्तर बढिरहेको भए पनि सोहीअनुसार पूर्वाधार र जनशक्ति विस्तार हुन नसक्दा बिरामीले समयमै सेवा पाउन कठिनाइ भइरहेको छ । अस्पताल प्रशासनले डायलाइसिस सेवालाई प्रभावकारी बनाउन थप शय्या, उपकरण र दक्ष जनशक्तिको तत्काल आवश्यकता रहेको जनाएको छ ।

Originally published on abcnews.com.np.