काठमाडौं । नेपाली कांग्रेसका महामन्त्री प्रदीप पौडेलले पार्टीभित्र असन्तुष्ट रहेका नेताहरूलाई फरक विचारसहित पार्टी कार्यालय सानेपा आउन आग्रह गरेका छन् ।

सामाजिक सञ्जालमार्फत पौडेलले सानेपालाई लोकतन्त्रको ‘पवित्र मन्दिर’को संज्ञा दिँदै असन्तुष्ट नेताहरूलाई पार्टीभित्रै बसेर संवाद र छलफलमार्फत समस्या समाधान गर्न आग्रह गरेका हुन् ।

“यो तपाईं–हामीले निर्माण गरेको लोकतन्त्रको पवित्र मन्दिर हो । आफ्नो फरक विचारलाई बोकेर पार्टीको साझा मन्दिर सानेपा आउनुहोस्,” पौडेलले भनेका छन् ।

पार्टीभित्रका असहमति सडकमा लैजाने वा अदालतको ढोका ढकढक्याउने समय नभएको उल्लेख गर्दै पौडेलले कांग्रेसको विवाद राजनीतिक संवादबाटै समाधान हुनुपर्ने बताएका छन् ।

“मलाई लाग्छ, नेपाली कांग्रेसको विवाद अदालतले निरूपण गर्ने विषय होइन र हुनुहुँदैन । राजनीतिक मुद्दाको समाधान केवल राजनीतिक संवादबाट मात्र सम्भव छ,” उनले भनेका छन् ।

पौडेलले पार्टी कार्यालय सानेपामा बसेर मनैदेखि संवाद गर्न, विगतका कमजोरीलाई आत्मसात् गर्दै अघि बढ्न र आगामी १५औँ महाधिवेशन निर्धारित समयमै सम्पन्न गर्न आग्रह गरेका छन् । महाधिवेशनबाट कार्यकर्ताले रोजेको नेतृत्वलाई स्वीकार गर्दै पार्टीलाई एकताबद्ध बनाउनुपर्ने उनको भनाइ छ ।

उनले कांग्रेसभित्रको विवादका कारण पार्टी कमजोर हुँदा मुलुकले समेत सही नेतृत्व पाउन नसक्ने बताएका छन् ।

“हामी झगडिया वा रमिते भएर बस्दा देशले सही नेतृत्व पाउँदैन । अहिलेको सरकारलाई खबरदारी पुगेन भने यसले देशलाई फर्कनै नसक्ने अनिश्चयको दिशामा लैजानेछ,” पौडेलले भनेका छन् ।

ऐतिहासिक पार्टीलाई थप सशक्त बनाउन सबैको एकता र सक्रियता आवश्यक रहेको उल्लेख गर्दै पौडेलले मतभेदलाई थाँती राखेर पार्टीको मूल प्रवाहमा गोलबद्ध हुनसमेत अपिल गरेका छन् ।

नेपाल र नेपाली जनताको भविष्यका लागि सबै मिलेर अघि बढ्नुपर्नेमा जोड दिँदै उनले असन्तुष्ट नेताहरूलाई विनाशर्त सानेपा आउन आग्रह गरेका छन् ।

“अग्रजहरूको त्याग, बलिदान र बीपी कोइरालाको विचारको जगमा उभिएको यस पार्टीले इतिहासका हरेक कठिन मोडमा मुलुकलाई सही दिशा दिएको छ,” उनले भनेका छन् । “नेपाली कांग्रेसको नेतृत्वमा प्राप्त भएका ऐतिहासिक उपलब्धिहरू हाम्रा गौरव हुन् ।”

Originally published on abcnews.com.np.