भन्सार विभागको तथ्यांकअनुसार २०८२ सालको साउनमा ४ अर्ब ६६ करोड ६४ लाख ६७ हजार रुपैयाँ बराबरको ४ करोड ४३ लाख १८ हजार ८९३ किलोग्राम एलपीजी आयात भएको थियो।

चालू आर्थिक वर्ष २०८३/८४ को साउनमा भने ८ अर्ब ४६ करोड ९२ लाख २८ हजार रुपैयाँ बराबरको ५ करोड ७३ लाख ३४ हजार १०६ किलोग्राम एलपीजी आयात भएको छ।

गत वर्षको साउनको तुलनामा यस वर्ष १ करोड ३० लाख १५ हजार २१३ किलोग्राम बढी एलपीजी आयात भएको विभागले जनाएको छ। मूल्यका आधारमा पनि ग्यास आयात उल्लेख्य रूपमा बढेको देखिन्छ।

एलपीजीको आयात बढे पनि साउन महिनामा उपभोक्ताले ग्यासको अभाव र वितरण समस्याको सामना गर्नुपरेको थियो। धेरै उपभोक्ता खाली सिलिण्डर बोकेर ग्यास डिपो र बिक्री केन्द्रमा लामो समय लाइन बस्न बाध्य भएका थिए।

केही महिनाअघि आपूर्ति कम भएपछि सरकारले आधा सिलिण्डर मात्र ग्यास वितरण गरेको थियो। त्यसका कारण धेरै उपभोक्तासँग खाली सिलिण्डर जम्मा भएका थिए। पछि एकैपटक पूर्ण सिलिण्डर वितरण सुरु भएपछि ग्यास डिपोमा उपभोक्ताको चाप बढेको थियो।

करिब १५ दिनसम्म मागअनुसार ग्यास वितरण हुन नसकेको बताइएको छ। पछिल्लो समय आयात बढे पनि वितरण प्रणाली व्यवस्थित हुन नसक्दा उपभोक्ताले समस्या भोग्नुपरेको देखिएको छ।

यसैबीच, साउनमा नेपालको कुल वस्तु आयात पनि अघिल्लो वर्षको सोही अवधिको तुलनामा करिब २४ प्रतिशतले बढेको छ। कुल आयात वृद्धिमा एलपीजी ग्यासको ठूलो परिमाणमा भएको आयातले समेत योगदान गरेको देखिएको छ।