ललितपुरको पाटन दरबार स्क्वायर, मंगलबजारबाट सुरु भएको पाँच किलोमिटर महिला दौड पुल्चोक–झम्सिखेल–भैंसीपाटी–एकान्तकुना–जावलाखेल–पुल्चोक हुँदै पुनः पाटन दरबार स्क्वायरमै पुगेर सम्पन्न भएको हो।

प्रतियोगितामा पूर्णलक्ष्मी न्यौपानेले पाँच किलोमिटर दूरी १७ मिनेट ४२.८ सेकेन्डमा पूरा गर्दै प्रथम स्थान हासिल गरिन्। निशा मस्कोटीले १७ मिनेट ४६.२ सेकेन्डमा दोस्रो तथा निर्मला केसीले १८ मिनेट ९.१ सेकेन्डमा तेस्रो स्थान हासिल गरिन्।

सुनसरी रोकाया चौथो, श्रृजना पाण्डे पाँचौँ र आशा रावत छैटौँ भए।

पुरस्कार

प्रथम हुनेलाई ५० हजार, द्वितीयलाई २५ हजार, तृतीयलाई २० हजार, चौथोलाई १२ हजार, पाँचौँलाई १० हजार र छैटौँलाई आठ हजार रुपैयाँ पुरस्कार प्रदान गरिएको छ।

नेपाली कांग्रेसकी उपसभापति पुष्पा भुसालले विजेतालाई पुरस्कारको चेक हस्तान्तरण गरिन्। सहमहामन्त्रीद्वय डा. डिला संग्रौला पन्त र मुक्ताकुमारी यादवले क्रमशः ट्रफी र पदक प्रदान गरे।

नेपाल महिला संघको सहभागितामा आयोजित प्रतियोगिताअघि स्थानीय नागरिकका तर्फबाट धिमे बाजा र लाखे नृत्य प्रस्तुत गरिएको थियो।

दौडमा सहभागी महिलाहरूले बारामा बलात्कारपछि हत्या गरिएकी तीन वर्षीया बालिका गरिमा चौधरीलाई न्याय दिन माग गर्दै ‘जस्टिस फर गरिमा चौधरी’ लेखिएका प्लेकार्ड बोकेर मौन प्रदर्शनसमेत गरेका थिए।