चितवन, भदौ ७ गते । चितवनको खैरहनी नगरपालिका–१, तरकारीचोकस्थित महेन्द्र राजमार्गमा शनिबार भएको सवारी दुर्घटनामा मृत्यु भएका दुई जना दिदी–भाइ रहेको खुलेको छ।

जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलका अनुसार मृतकका बुबा शेष अख्तर हुसेनले शवको सनाखत गरेपछि उनीहरू आफ्नै छोरा–छोरी रहेको पुष्टि भएको हो।

मृतकमा सर्लाहीको ब्रह्मपुरी गाउँपालिका–४ निवासी २३ वर्षीय महेबुब रजा र महोत्तरीको गौशाला नगरपालिका–५ निवासी अजिमा प्रविन रहेका छन्।

प्रहरीका अनुसार दुवैको शव आइतबार पोस्टमार्टमपछि परिवारलाई बुझाइनेछ।

शनिबार दिउँसो करिब १२ः३० बजे नारायणगढबाट बर्दिबासतर्फ जाँदै गरेको बा.प्र.०३–००१ ख २७७३ नम्बरको बसले विपरीत दिशाबाट आउँदै गरेको बा.प्र.०१–०१५ प ३३८५ नम्बरको मोटरसाइकललाई तरकारीचोकमा ठक्कर दिएको थियो।

दुर्घटनामा मोटरसाइकलमा सवार दिदी–भाइ दुवैको मृत्यु भएको प्रहरीले जनाएको छ।

घटनाबारे थप अनुसन्धान भइरहेको जिल्ला प्रहरी कार्यालय चितवनले जनाएको छ।

Originally published on abcnews.com.np.