काठमाडौं । अमेरिकाले क्यानडाबाट आयात हुने करिब २० अर्ब डलर मूल्य बराबरका वस्तुमा ५० प्रतिशत अतिरिक्त भन्सार महसुल लगाएपछि क्यानडाले पनि अमेरिकी उत्पादनमा जवाफी ट्यारिफ लगाउने घोषणा गरेको छ ।

क्यानडाका प्रधानमन्त्री मार्क कार्नीले आगामी सेप्टेम्बर ८ देखि अमेरिकी स्टिल, दुग्धजन्य उत्पादन, घरायसी उपकरण, कृषि औजार, पल्प तथा पेपर र विद्युतीय सामग्रीलगायतका वस्तुमा जवाफी महसुल लगाउने घोषणा गरेका हुन् । कुन वस्तुमा कति दर कायम गर्ने भन्ने विस्तृत विवरण भने पछि सार्वजनिक गरिने बताइएको छ ।

वासिङ्टन डिसीमा तीन दिनसम्म भएको अमेरिका–क्यानडा व्यापार वार्ता कुनै सम्झौतामा पुग्न नसकेपछि दुवै देशबीच व्यापार तनाव थप बढेको हो । अमेरिकी कदमले क्यानडाबाट आयात हुने करिब २० अर्ब डलर मूल्यका वस्तुलाई प्रभावित गर्नेछ, जुन क्यानडाको अमेरिकातर्फको कुल निर्यातको करिब ५ प्रतिशत बराबर रहेको बताइएको छ ।

प्रधानमन्त्री कार्नीले अमेरिकाले लगाउने प्रत्येक डलरको जवाफ क्यानडाले पनि ‘डलरका बदला डलर’ का रूपमा दिने स्पष्ट पारेका छन् ।

अमेरिकाको आरोप

वार्ता असफल भएपछि अमेरिकी व्यापार प्रतिनिधिको कार्यालयले क्यानडाले व्यापारिक साझेदारीको ठूलो अवसर गुमाएको प्रतिक्रिया दिएको छ । अमेरिकाले अन्य प्रमुख निर्यातक मुलुकको तुलनामा क्यानडालाई राम्रो प्रस्ताव दिएको दाबी गर्दै क्यानडाका नयाँ माग तथा यसअघि गरिएका प्रतिबद्धताबाट पछि हट्ने नीतिका कारण सहमति हुन नसकेको आरोप लगाएको छ ।

सम्झौता भएको भए एयरोस्पेस आपूर्ति शृंखला, गैरकानुनी व्यापार नियन्त्रण, खनिज सहकार्य तथा ‘युएसएमसीए’ सम्बन्धी वार्तामा सहजता आउने अमेरिकी पक्षको भनाइ छ ।

दुग्ध र अन्य वस्तुमा विवाद

अमेरिकाले क्यानडाको दुग्ध बजारसम्बन्धी नीतिलाई लामो समयदेखि आलोचना गर्दै आएको छ । क्यानडाले स्थानीय दुग्ध उत्पादकको संरक्षणका लागि विदेशी तथा सस्ता दुग्धजन्य उत्पादनमा कडा प्रतिबन्ध लगाउँदै आएको भन्दै अमेरिकाले आफ्ना उत्पादनलाई क्यानाडाली बजारमा थप सहज पहुँच दिन माग गर्दै आएको छ ।

त्यसैगरी, क्यानडाका केही प्रान्तमा अमेरिकी मदिराको बिक्रीमा लगाइएको रोक, क्यानाडाली सफ्टवुड आयातमा लगाइँदै आएको प्रतिबन्ध तथा महसुललगायतका विषयमा पनि दुई देशबीच लामो समयदेखि मतभेद रहँदै आएको छ ।

यसपटकको वार्ता पनि निष्कर्षविहीन भएपछि अमेरिका र क्यानडाबीचको व्यापार विवाद थप चर्किने संकेत देखिएको छ।

Originally published on abcnews.com.np.