काठमाडौं । नेपालको सबैभन्दा ठूलो अटोमोबाइल तथा मोबिलिटी प्रदर्शनी ‘एचपी ल्युब्रिकेन्ट्स प्रिजेन्ट्स १८औँ नाडा अटो शो २०२६’ नजिकिँदै गर्दा काठमाडौंको भृकुटीमण्डपमा स्टल निर्माणको काम तीव्र पारिएको छ । यही भदौ ९ देखि १४ गतेसम्म आयोजना हुने प्रदर्शनीको तयारी अन्तिम चरणमा पुगेको आयोजक नाडा अटोमोबाइल्स एसोसिएसन अफ नेपालले जनाएको छ ।

प्रदर्शनीस्थलमा विभिन्न अटोमोबाइल ब्रान्ड, अटो पार्ट्स तथा कम्पोनेन्ट, टायर, ल्युब्रिकेन्ट्स, ब्याट्री, चार्जिङ पूर्वाधार, ग्यारेज उपकरण, बैंक तथा बिमा कम्पनीका स्टल निर्माण धमाधम भइरहेको छ । यस वर्षको प्रदर्शनीमा २०० भन्दा बढी स्टल रहने आयोजकले जनाएको छ ।

करिब तीन लाख वर्गफिट क्षेत्रफलमा आयोजना हुने प्रदर्शनीमा यात्रुवाहक २३, हल्का व्यावसायिक १७ र दुईपांग्रे १३ गरी ५३ वटा सवारी ब्रान्ड सहभागी हुँदैछन् । प्रदर्शनीमा नयाँ सवारीसाधन, विद्युतीय सवारी, अत्याधुनिक प्रविधि तथा विभिन्न अटोमोबाइल उत्पादन र सेवाहरू प्रदर्शन गरिनेछ ।

त्यस्तै, करिब ७० स्टलमा अटो पार्ट्स, टायर, ब्याट्री, ल्युब्रिकेन्ट्स, एसेसरिज तथा ग्यारेज उपकरणलगायत सामग्री राखिनेछ । बैंक, वित्तीय संस्था तथा बिमा कम्पनीको समेत प्रदर्शनीमा सहभागिता रहनेछ ।

स्टल निर्माणको चटारो

प्रदर्शनी सुरु हुन केही दिन मात्रै बाँकी रहेकाले भृकुटीमण्डपमा अहिले स्टल निर्माणको चटारो छ । विभिन्न ब्रान्डका स्टललाई आकर्षक र प्रविधिमैत्री बनाउन निर्माणसँगै विद्युत्, प्रकाश, डिजिटल डिस्प्ले, ब्रान्डिङ तथा अन्य प्राविधिक व्यवस्थापनको काम पनि भइरहेको आयोजकले जनाएको छ ।

नाडाको स्वर्णजयन्ती संस्करण

यस वर्ष नाडाको ५०औँ स्थापना वर्षसमेत रहेकाले अटो शो स्वर्णजयन्ती संस्करणका रूपमा आयोजना हुँदैछ । त्यसैले विगतका संस्करणको तुलनामा प्रदर्शनीलाई थप व्यवस्थित, प्रविधिमैत्री र आकर्षक बनाउने तयारी गरिएको आयोजकको भनाइ छ ।

अटोमोबाइल क्षेत्रको ‘शोकेस’

नाडा अटो शोमा नयाँ सवारीसाधन तथा प्रविधिको प्रदर्शनसँगै उपभोक्ता, व्यवसायी, वितरक, वित्तीय संस्था र अटोमोबाइल क्षेत्रका अन्य सरोकारवालाबीच प्रत्यक्ष सम्पर्क तथा व्यावसायिक अन्तरक्रियाको अवसरसमेत प्राप्त हुनेछ ।

आयोजकका अनुसार प्रदर्शनीले नेपालको अटोमोबाइल तथा मोबिलिटी क्षेत्रको पछिल्लो अवस्था, बजारमा भित्रिएका नयाँ प्रविधि र भविष्यको बजार दिशाबारे जानकारी लिन एउटै थलोबाट अवसर प्रदान गर्नेछ ।

‘मेड इन नेपाल’ प्याभेलियन

यस वर्ष प्रदर्शनीमा ‘मेड इन नेपाल’ र ‘मेड फर नेपाल’ प्याभेलियनसमेत राखिने भएको छ । प्याभेलियनमार्फत नेपालमै उत्पादन तथा एसेम्बल भएका सवारीसाधन, विद्युतीय सवारी, ब्याट्री, हेल्मेट तथा अन्य अटोमोबाइल कम्पोनेन्टको प्रवर्द्धन गरिने आयोजकले जनाएको छ ।

Originally published on abcnews.com.np.