रुपन्देही । सशस्त्र प्रहरी बल नेपाल नं. ५ विन्ध्यवासिनी बाहिनी मुख्यालय रुपन्देहीले नवौँ स्थापना दिवस मनाएको छ। कपिलवस्तुको चन्द्रौटामा आयोजित समारोहमा सशस्त्र प्रहरी बलका महानिरीक्षक नारायणदत्त पौडेलले संगठनले हासिल गरेको व्यावसायिक उपलब्धिलाई राष्ट्रहितमा उपयोग गर्न निर्देशन दिएका छन्।

महानिरीक्षक पौडेलले समयअनुकूल सुरक्षा रणनीति अवलम्बन गर्दै उच्चस्तरीय अनुशासन कायम गर्न आग्रह गरे। नागरिक सेवा, शान्ति सुरक्षा तथा अमनचयन कायम गर्ने जिम्मेवारीमा सशस्त्र प्रहरी थप जिम्मेवार भएर लाग्नुपर्ने उनको भनाइ थियो।

मानवअधिकारको सम्मान गर्दै आवश्यकताअनुसार मात्र बल प्रयोग गर्नुपर्नेमा जोड दिँदै पौडेलले सीमा सुरक्षा राष्ट्रको संवेदनशील विषय भएकाले सीमाक्षेत्रका गतिविधिमाथि सूक्ष्म निगरानी गर्न निर्देशन दिए। पछिल्लो समय सीमाबाट हुने लागुऔषध ओसारपसार नियन्त्रणमा विशेष ध्यान दिनुपर्ने उनले बताए।

सशस्त्र प्रहरी सीमा सुरक्षाको पहिलो पहरेदार भएकाले निष्पक्ष, जिम्मेवार र व्यावसायिक ढंगले काम गर्नुपर्ने महानिरीक्षक पौडेलको भनाइ थियो।

विपद् व्यवस्थापनमा पनि सशस्त्र प्रहरीले सक्रिय भूमिका निर्वाह गर्नुपर्ने उनले बताए। विपद् व्यवस्थापन एकल प्रयासबाट सम्भव नहुने भन्दै अन्य सरोकारवाला निकायसँग प्रभावकारी समन्वय गर्न उनले निर्देशन दिए।

उनले वर्तमान सरकारको सुशासनको अवधारणालाई आत्मसात गर्दै संगठनको नीति तथा निर्देशनअनुसार अघि बढ्नसमेत आग्रह गरे।

समारोहमा कर्तव्यपालनका क्रममा मृत्यु भएका सशस्त्र प्रहरी कर्मचारीका परिवारलाई सम्मान गरिएको थियो। विभिन्न विधामा उत्कृष्ट कार्यसम्पादन गर्ने सशस्त्र प्रहरी कर्मचारीलाई सम्मान तथा पुरस्कारसमेत प्रदान गरिएको थियो।

बाहिनीपति सशस्त्र प्रहरी नायब महानिरीक्षक दीपक अधिकारीले बाहिनीको स्थापना र हालसम्मका गतिविधिबारे जानकारी गराएका थिए।

१२ जिल्लामा १०६ इकाइ

विसं २०७५ भदौ ७ गते स्थापना भएको नं. ५ विन्ध्यवासिनी बाहिनी मुख्यालयअन्तर्गत १२ जिल्ला रहेका छन्। बाहिनीअन्तर्गत आठ गण, छ गुल्म, एक मद्दती सेवा गुल्म, नौ सीमा सुरक्षा गुल्म, ५० बीओपी, २७ सुरक्षा बेस र पाँच एफओबी गरी १०६ इकाइ रहेको जानकारी दिइएको छ।

Originally published on abcnews.com.np.