काठमाडौँ । पूर्वप्रधानमन्त्री डा. बाबुराम भट्टराईले सामाजिक सञ्जालमार्फत आफ्नो घर जलाउने धम्की दिने व्यक्तिलाई तत्काल पक्राउ गरी कानुनी कारबाही गर्न सरकारसँग माग गरेका छन्।

डा. भट्टराईले फेसबुकमा आफूविरुद्ध लेखिएको धम्कीपूर्ण सन्देशको स्क्रिनसट सार्वजनिक गर्दै यस्ता गतिविधिमा संलग्न व्यक्तिलाई राज्यले बेलैमा नियन्त्रणमा लिनुपर्ने बताएका हुन्।

गएराति सामाजिक सञ्जालमार्फत प्रतिक्रिया जनाउँदै उनले लेखेका छन्, ‘यस्ता अपराधीलाई राज्यले बेलैमा नियन्त्रणमा लिएर विधिवत् कारबाही गरोस्।’

धम्कीको घटनालाई गम्भीर रूपमा लिँदै उनले जेनजी विद्रोहको वार्षिकी नजिकिँदै गर्दा प्रतिगामी तथा राष्ट्रघाती शक्तिहरू सक्रिय हुन सक्ने आशंका समेत व्यक्त गरेका छन्।

उनले लेखेका छन्, “अन्यथा जेनजी विद्रोहको वार्षिकी नजिकिँदै गर्दा भेडाको छाला ओढेर प्रतिगामी र राष्ट्रघाती ब्वाँसाहरूले संघीय लोकतान्त्रिक गणतन्त्र र राष्ट्रिय सर्वभौमिकताविरुद्ध वितण्डा मच्चाउने थप जघन्य अपराध गर्न सक्छन्।”

डा. भट्टराईले सामाजिक सञ्जालमा आउने धम्की र हिंसात्मक अभिव्यक्तिलाई सामान्य रूपमा नलिन सरकारको ध्यानाकर्षण गराएका छन्। यस्ता गतिविधि समयमै नियन्त्रणमा नलिए राजनीतिक अस्थिरता र हिंसात्मक गतिविधिलाई प्रोत्साहन मिल्न सक्ने उनको संकेत छ।

पूर्वप्रधानमन्त्री भट्टराईले सार्वजनिक रूपमा आफ्नो घर जलाउने धम्की आएको भन्दै सम्बन्धित निकायलाई घटनाको अनुसन्धान गरी दोषीलाई तत्काल कानुनी दायरामा ल्याउन आग्रह गरेका छन्।

Originally published on abcnews.com.np.