तेहरान । अमेरिकाले इरानविरुद्ध ‘अहिलेसम्मकै ठुलो आर्थिक आक्रमण’ गर्ने चेतावनी दिएपछि इरानले त्यसको कडा प्रतिक्रिया जनाएको छ। इरानको इस्लामिक रिभोलुसनरी गार्ड कोर्प्स (आईआरजीसी) का प्रवक्ता ब्रिगेडियर जनरल हुसेन मोहेब्बीले अमेरिकी आर्थिक दबाबको घोषणा सैन्य मोर्चामा असफलताको अप्रत्यक्ष स्वीकारोक्ति भएको दाबी गरेका छन्।

मोहेब्बीले अमेरिकाले आर्थिक आक्रमणको कुरा गर्नु उसको सैन्य असफलताको संकेत भएको बताएका छन्। उनका अनुसार अमेरिकी सेनालाई आफ्ना जहाज उल्लेखनीय रूपमा पछि हटाउन बाध्य पारिएको छ भने हर्मुज स्ट्रेट खोल्ने तथा इरानको प्रतिरक्षा प्रणाली तोड्ने प्रयास पनि सफल हुन सकेका छैनन्।

उनले इरानी सञ्चारमाध्यमलाई युद्धको वास्तविक अवस्था र त्यसमा संलग्न पक्षबारे सही सूचना प्रवाह गर्न आग्रह गरेका छन्। उनका अभिव्यक्तिहरूलाई इरानले अमेरिकी दबाबको सामना गर्ने आफ्नो अडानका रूपमा प्रस्तुत गरेको छ।

यसअघि अमेरिकी अर्थमन्त्री स्कट बेसेन्टले इरानमाथि व्यापक आर्थिक प्रतिबन्ध तथा दबाबको नयाँ चरण सुरु हुने बताएका थिए। अमेरिकी पक्षले यसलाई अहिलेसम्मकै कडा आर्थिक अभियानका रूपमा अघि बढाउने संकेत गरेको छ।

अमेरिका–इरान तनावसँगै हर्मुज स्ट्रेटको अवस्थाले पनि थप चिन्ता बढाएको छ। विश्वव्यापी ऊर्जा आपूर्तिका लागि महत्वपूर्ण मानिने यस जलमार्गलाई लिएर दुवै पक्षबीचको टकरावले तेल आपूर्ति र अन्तर्राष्ट्रिय व्यापारमा समेत असर पार्न सक्ने जोखिम बढेको छ।

Originally published on abcnews.com.np.