काठमाडौँ । लगानी बोर्ड नेपालकी नवनियुक्त प्रमुख कार्यकारी अधिकृत (सीईओ) याङ्की उक्याबले सोमबार पदभार ग्रहण गरेकी छन्।

नियुक्त भएको करिब तीन सातापछि उनले लगानी बोर्डको जिम्मेवारी सम्हालेकी हुन्। उक्याबले सोमबार नै प्रधानमन्त्री तथा मन्त्रिपरिषद्को कार्यालयबाट नियुक्तिपत्र ग्रहण गरेकी थिइन्।

मन्त्रिपरिषद्को गत साउन २० गतेको निर्णयले उक्याबलाई लगानी बोर्ड नेपालको सीईओमा नियुक्त गरेको थियो। लगानी बोर्डको प्रमुख कार्यकारी अधिकृतको कार्यकाल चार वर्ष रहने व्यवस्था छ।

सरकारले गत वैशाखमा ल्याएको ‘सार्वजनिक पदाधिकारीको पदमुक्तसम्बन्धी विशेष व्यवस्था अध्यादेश, २०८३’ बमोजिम तत्कालीन सीईओ सुशील ज्ञवाली स्वतः पदमुक्त भएपछि लगानी बोर्डको प्रमुख कार्यकारी अधिकृत पद रिक्त भएको थियो।

रिक्त पदपूर्तिका लागि सरकारले जेठ २९ गते लगानी बोर्डको सीईओ पदका लागि सार्वजनिक आह्वान गरेको थियो। सोही विज्ञापन तथा छनोट प्रक्रियाका आधारमा उक्याबलाई बोर्डको नयाँ प्रमुख कार्यकारी अधिकृत नियुक्त गरिएको हो।

Originally published on abcnews.com.np.