काठमाडौं । साताको दोस्रो कारोबार दिन मंगलबार पनि सेयर बजार परिसूचक नेप्से घटेको छ। मंगलबार नेप्से ५.३० अंक अर्थात् ०.२० प्रतिशतले घटेर २ हजार ५९४.२७ विन्दुमा बन्द भएको हो।

सोमबार नेप्से १९.१३ अंकले घटेर २ हजार ५९९.५८ विन्दुमा बन्द भएको थियो। यससँगै बजार लगातार दोस्रो कारोबार दिन ओरालो लागेको छ।

मंगलबार ३५७ कम्पनीका ४६ हजार ५५८ पटकको कारोबारबाट कुल ४ अर्ब १० करोड ५५ लाख २१ हजार १०७ रुपैयाँ बराबरको कारोबार भएको छ।

कारोबारमा ७८ कम्पनीको सेयर मूल्य बढेको छ भने १८७ कम्पनीको घटेको छ। १२ कम्पनीको सेयर मूल्य स्थिर रहेको छ।

सर्वोत्तम पेन्ट्सको सेयरमा उच्च वृद्धि

मंगलबार कारोबार सुरु भएदेखि नै घटेको बजारमा दिनभर उतारचढाव देखिएको थियो। सबैभन्दा धेरै सेयर मूल्य बढ्ने कम्पनीमा सर्वोत्तम पेन्ट्स रहेको छ। कम्पनीको सेयर मूल्य १४.९९ प्रतिशतले बढेको छ।

त्यस्तै, धौलागिरि लघुवित्त वित्तीय संस्थाको सेयर मूल्य ११.९८ प्रतिशतले बढेको छ।

पञ्चकन्यामाई हाइड्रोको सेयर घट्यो

सबैभन्दा धेरै सेयर मूल्य घट्ने कम्पनीमा पञ्चकन्यामाई हाइड्रोपावर रहेको छ। कम्पनीको सेयर मूल्य ९.८३ प्रतिशतले घटेको छ।

उपसमूहतर्फ विकास बैंक र निर्जीवन बिमा समूहको सूचक बढेको छ भने बाँकी सबै समूहको सेयर मूल्य घटेको छ।

समग्रमा बिक्री चाप कायम रहँदा नेप्से परिसूचक लगातार दोस्रो दिन घटेको हो।

Originally published on abcnews.com.np.