काठमाडौं । अर्थमन्त्री डा. स्वर्णिम वाग्लेले सूचना प्रविधि (आईटी) क्षेत्रमा काम गरिरहेका युवा उद्यमीलाई स्वदेशमै निर्धक्क भएर लगानी बढाउन आग्रह गरेका छन्।

मंगलबार अर्थ मन्त्रालयमा सूचना प्रविधि क्षेत्रका युवा उद्यमीसँग छलफल गर्दै मन्त्री वाग्लेले आईटी क्षेत्र सरकारको विशेष प्राथमिकतामा रहेको बताए।

‘सूचना प्रविधि क्षेत्र छोटो समयमा ठूलो फड्को मार्न सकिने क्षेत्र हो, तपाईं युवा उद्यमीहरू लगानी बढाउनुहोस्। सरकार तपाईंहरूको साथमा छ। के–के गर्नुपर्ने हो भन्नुहोस्,’ उनले भने।

नेपालले विगतमा कृषि उत्पादन तथा निर्यातमा लामो समय लगानी गरे पनि सूचना प्रविधिमा तुलनात्मक रूपमा कम समयमा प्रतिफल प्राप्त गर्न सकिने मन्त्री वाग्लेको भनाइ छ।

एआईमा लगानी र प्रविधि कम्पनी भित्र्याउने तयारी

मन्त्री वाग्लेले चालु आर्थिक वर्षको बजेटमा सूचना प्रविधि क्षेत्रलाई विशेष प्राथमिकता दिइएको जानकारी दिए। कृत्रिम बुद्धिमत्ता (एआई) विकासका लागि बजेट विनियोजन गर्नुका साथै आईटी क्षेत्रमा काम गर्ने युवा उद्यमीलाई प्रोत्साहन गर्ने नीति सरकारले लिएको उनले बताए।

विश्वस्तरीय सूचना प्रविधि कम्पनीलाई नेपालमा आकर्षित गर्न समेत सरकारले पहल गरिरहेको उनले जानकारी दिए।

एकल विन्दु सेवाको माग

छलफलमा सहभागी दुई दर्जनभन्दा बढी युवा उद्यमीले सूचना प्रविधि क्षेत्रलाई प्राथमिकता दिएकोमा सरकारलाई धन्यवाद दिएका थिए।

उनीहरूले आईटीसम्बन्धी सेवा प्रभावकारी बनाउन एकल विन्दु सेवा केन्द्र सञ्चालन गर्नुपर्ने सुझाव दिए। त्यसैगरी विदेशी मुद्रा सटही सुविधा सहज बनाउन तथा सूचना प्रविधि क्षेत्रसँग सम्बन्धित कानुनी जटिलता हटाउनुपर्ने उनीहरूको माग थियो।

समस्या खुलस्त राख्न आग्रह

मन्त्री वाग्लेले काम गर्ने क्रममा देखिएका समस्या तथा कमीकमजोरीबारे सरकारलाई स्पष्ट जानकारी गराउन उद्यमीहरूलाई आग्रह गरे।

सरकार र निजी क्षेत्रबीच सहकार्यबाट सूचना प्रविधिको क्षेत्रमा थप लगानी र रोजगारीका अवसर सिर्जना गर्न सकिने भन्दै उनले उद्यमीहरूलाई आफ्ना समस्या स्पष्ट रूपमा राखेर समाधानको प्रक्रियामा सहभागी हुन आग्रह गरे।

Originally published on abcnews.com.np.