काठमाडौं । चलचित्र ‘पेन्सन पट्टा’को ट्रेलर सार्वजनिक भएको छ। लाहुरे परिवारको उतारचढाव, पारिवारिक सम्बन्धको जटिलता र पहिचानसँग जोडिएको कथामा आधारित ट्रेलर सार्वजनिक गरिएको हो।

माओत्से गुरुङको निर्देशन तथा दयाहाङ राईको मुख्य अभिनय रहेको चलचित्रको ट्रेलर दिवंगत बाबुको पेन्सन पट्टामा आमाको नाम नभेटिएपछि उत्पन्न समस्याको वरिपरि केन्द्रित छ।

ट्रेलरमा बाबुको पेन्सन पट्टामा आमाको नामको सट्टा बाबुको पहिलो पत्नीको नाम रहेको देखाइएको छ। त्यसपछि पहिलो पत्नी को थिइन् भन्ने खोजी र त्यससँग जोडिएका पारिवारिक रहस्यलाई कथाका रूपमा अघि बढाइएको छ।

पेन्सनको अधिकारसँग जोडिएको विषयमार्फत चलचित्रले पारिवारिक विगत, सम्बन्धमा आएको दूरी, पहिचान र अधिकारका प्रश्नलाई प्रस्तुत गरेको छ।

लाहुरे जीवनको भावनात्मक पाटो

‘पेन्सन पट्टा’ले लाहुरे जीवनसँग जोडिएको सामाजिक तथा पारिवारिक पक्षलाई पर्दामा ल्याउने निर्माणपक्षले जनाएको छ। चलचित्रले लाहुरे परिवारको बाह्य चमकसँगै उनीहरूले भोग्ने भावनात्मक पीडा, सम्बन्धको जटिलता र सामाजिक यथार्थलाई समेत प्रस्तुत गर्ने बताइएको छ।

चलचित्रमा दयाहाङ राई, गौमाया गुरुङ, विल्सन विक्रम राई, बुद्धि तामाङ, पशुपति राई, विश्वास गुरुङ, माया गुरुङ, पुष्करबहादुर गुरुङ, स्वर्गीय सुनील थापा र लुनीभा तुलाधरलगायत कलाकारको अभिनय छ।

‘पेन्सन पट्टा’ भदौ २६ गतेदेखि प्रदर्शनमा आउने भएको छ।

Originally published on abcnews.com.np.