बर्लिन । जर्मनीस्थित नेपाली दूतावासका प्रथम सचिव रञ्जन यादवले एकै दिन ४२ दिनको हाजिरी गरेको विवरण सार्वजनिक भएको छ ।

दूतावासमा उपलब्ध हाजिरी अभिलेखअनुसार यादवले गत वैशाख २९ देखि असार ८ गतेसम्मको हाजिरी एकैपटक गरेको देखिएको छ । दूतावास स्रोतका अनुसार उनले रातिको समयमा कार्यालय खोलेर हाजिरी खातामा हस्ताक्षर गर्नुभएको थियो ।

तत्कालीन कार्यवाहक राजदूत सागरप्रसाद फुयाँलले यादवको हाजिरीमा कैफियत जनाउँदै रातो मसीले काट्नुभएको अभिलेखसमेत फेला परेको छ । कैफियतमा ‘बिना सूचना वा पूर्वस्वीकृति नलिई कार्यालयमा उपस्थित नभएको, दूतावासमा कुनै समय आई एकैपटक हाजिरी गरेको’ उल्लेख गरिएको जनाइएको छ ।

यस विषयमा हाल बर्लिनस्थित कार्यवाहक राजदूत नारायणप्रसाद वाग्लेले आफू कार्यभार सम्हाल्नुअघिको घटना भएकाले यसबारे आफू अनभिज्ञ रहेको बताउनुभएको छ ।

उहाँका अनुसार यस विषयमा तत्कालीन दूतावास नेतृत्व, परराष्ट्र मन्त्रालय र सम्बन्धित कर्मचारीले नै जवाफ दिनुपर्नेछ । मन्त्रालयको प्रशासन पक्षले आवश्यक ठानेमा थप कारबाही वा प्रक्रिया अघि बढाउने उहाँले बताउनुभयो ।

लामो समयसम्म बिना सूचना कार्यालयमा उपस्थित नभएपछि तत्कालीन कार्यवाहक राजदूत फुयाँलले यादवको अवस्थाबारे बुझ्न दूतावासका दुई कर्मचारीलाई उहाँको कोठामा पठाउनुभएको बताइएको छ ।

दूतावासका एक कर्मचारीका अनुसार यादवसँग सम्पर्क हुन नसकेपछि कुनै अप्रिय घटना भएको हुन सक्ने आशंकामा उहाँको कोठामा पुगिएको थियो । तर, ढोका नखुलेपछि कर्मचारीहरू फर्किएका थिए ।

यादवको हाजिरीसम्बन्धी घटनापछि तत्कालीन कार्यवाहक राजदूत फुयाँलले दूतावासमा सीसीटीभी क्यामरा र डिजिटल हाजिरी प्रणाली जडान गर्नुभएको स्रोतको दाबी छ ।

यादवमाथि दूतावासका पत्र बाहिर उपलब्ध गराएको तथा दूतावासको आधिकारिक फेसबुक पेजमा प्रकाशित सूचनामा अनधिकृत रूपमा तोडमोड गरेको आरोपसमेत लगाइएको छ । यी आरोपबारे सम्बन्धित निकायबाट स्वतन्त्र पुष्टि भने हुन बाँकी छ ।

यसैबीच, दूतावासले कर्मचारी भर्नाका लागि जारी गरेको सूचनामा अनधिकृत रूपमा परिवर्तन गरिएको विषयमा प्रतिक्रिया लिन खोज्दा यादवले पत्रकारलाई धम्की दिएको आरोपसमेत सार्वजनिक भएको छ ।

उक्त घटनापछि नेपाल पत्रकार महासंघको केन्द्रीय समिति तथा युरोप शाखाले विज्ञप्ति जारी गर्दै यादवको व्यवहारबारे तत्काल निष्पक्ष छानबिन गर्न नेपाल सरकार, परराष्ट्र मन्त्रालय तथा सम्बन्धित निकायसँग माग गरेका थिए । विदेशमा रहेर पत्रकारिता गरिरहेका पत्रकारको सुरक्षाको सुनिश्चितता गर्नसमेत महासंघले आग्रह गरेको थियो ।

यादवमाथि लगाइएका आरोप तथा हाजिरीसम्बन्धी विषयमा सम्बन्धित निकायबाट आधिकारिक छानबिनको निष्कर्ष सार्वजनिक भएपछि मात्र घटनाको वास्तविकता थप स्पष्ट हुनेछ ।

Originally published on abcnews.com.np.