विराटनगर । विगत १४ दिनदेखि बन्द रहेका विराटनगरका सातवटा आँखा अस्पताल मंगलबारदेखि पुनः सञ्चालनमा आएका छन्। जिल्ला प्रशासन कार्यालय, मोरङले दुई साताअघि सिलबन्दी गरेका सातवटै अस्पतालको ताला खोलिएसँगै सेवा पुनः सुरु भएको हो।

जिल्ला प्रशासन कार्यालयले मापदण्ड पूरा नभएको भन्दै साउन २७ र २८ गते विराट आँखा अस्पताल, सञ्जीवनी आई केयर, हिमाल आँखा अस्पताल, विराटरानी आँखा अस्पताल, अखण्ड ज्योति, नेपाल आँखा अस्पताल र इफराह आँखा अस्पतालमा सिलबन्दी गरेको थियो।

अस्पताल बन्द गरिएपछि संघीय प्रशासनले प्रदेश सरकारको क्षेत्राधिकारमा हस्तक्षेप गरेको भन्दै राजनीतिक दल, स्वास्थ्यकर्मी तथा विभिन्न संघसंस्थाले विरोध जनाएका थिए।

मुख्यमन्त्रीको निर्देशनपछि ताला खुल्यो

अस्पताल सिलबन्दी प्रकरण चर्किएपछि कोशी प्रदेश सरकारले स्वास्थ्य मन्त्रालयका उपसचिव निर्मल भट्टराईको नेतृत्वमा अध्ययन समिति गठन गरेको थियो।

समितिले प्रतिवेदन बुझाएपछि मुख्यमन्त्री हिक्मतकुमार कार्कीले अस्पताल पुनः सञ्चालनका लागि आवश्यक प्रक्रिया अघि बढाउन निर्देशन दिएका थिए।

मुख्यमन्त्री कार्कीले प्रदेशसभा बैठकमै जिल्ला प्रशासन कार्यालयले प्रदेश सरकारसँग समन्वय नगरी अस्पतालमा ताला लगाएको भन्दै असन्तुष्टि जनाएका थिए।

सोमबारको प्रदेशसभा बैठकमा पूर्वमुख्यमन्त्रीद्वय केदार कार्की र उद्धव थापाले समेत तत्काल अस्पताल सञ्चालनमा ल्याउन माग गरेका थिए। उनीहरूले स्वास्थ्य संस्थाको अनुमति, नवीकरण र नियमन गर्ने संवैधानिक अधिकार प्रदेश सरकारको भएको बताएका थिए।

‘नयाँ कार्यविधि नबनुन्जेल पुरानै स्वीकृतिमा सञ्चालन’

कोशी प्रदेशका स्वास्थ्य सचिव डा. कीर्तिपाल सुवेदीका अनुसार स्वास्थ्य मन्त्रालयद्वारा गठित अध्ययन समितिको प्रतिवेदन र विद्यमान कानुनी व्यवस्थाका आधारमा सातवटै आँखा अस्पताल पुनः सञ्चालनमा ल्याइएको हो।

उनले आँखा अस्पतालको सञ्चालन र नियमनका लागि प्रदेश सरकारले छुट्टै कार्यविधि तयार गरिरहेको जानकारी दिए।

सुवेदीले भने, “नयाँ कार्यविधि नबनुन्जेलसम्म स्वास्थ्य निर्देशनालयबाट पहिले नै स्वीकृति प्राप्त भएका अस्पतालहरू सञ्चालन हुनेछन्।”

संघ–प्रदेश अधिकार विवादको केन्द्रमा स्वास्थ्य संस्था

जनस्वास्थ्य सेवा ऐन, २०७५ तथा सम्बन्धित नियमावलीले स्वास्थ्य संस्थाको दर्ता, नवीकरण र अनुगमनको जिम्मेवारी विभिन्न तहका सरकारबीच बाँडफाँट गरेको छ।

प्रदेश सरकारले यही कानुनी व्यवस्थालाई आधार बनाउँदै प्रदेशभित्रका स्वास्थ्य संस्थाको नियमन आफ्नो क्षेत्राधिकारभित्र पर्ने दाबी गर्दै आएको छ। तर जिल्ला प्रशासन कार्यालयले मापदण्डको विषय उठाउँदै अस्पताल सिलबन्दी गरेपछि संघीय प्रशासन र प्रदेश सरकारबीच अधिकार क्षेत्रको विवाद सतहमा आएको थियो।

अन्ततः प्रदेश सरकारको पहल र अध्ययन समितिको प्रतिवेदनपछि १४ दिनदेखि बन्द रहेका विराटनगरका सातवटै आँखा अस्पतालको ताला खुलेको छ र स्वास्थ्य सेवा पुनः सञ्चालनमा आएको छ।

Originally published on abcnews.com.np.