काठमाडौं । सम्भावित विपद् तथा आपत्कालीन अवस्थालाई मध्यनजर गर्दै स्वास्थ्य तथा खाद्य स्वच्छता मन्त्रालयले स्वास्थ्य आपत्कालीन कार्यसञ्चालन केन्द्रलाई सक्रिय बनाएको छ ।

आपत्कालीन स्वास्थ्य सेवा तथा उद्धार व्यवस्थापनलाई प्रभावकारी बनाउन मन्त्रालयले नेपाल रेडक्रस सोसाइटी, लायन्स क्लब, नेपाल स्काउट, वाग्मती तथा गण्डकी प्रदेशका स्वास्थ्य मन्त्रालय, काठमाडौंस्थित संघीय अस्पताल र रक्तसञ्चार केन्द्रहरूसँग आवश्यक समन्वय गरिरहेको जनाएको छ ।

मन्त्रालयका अनुसार काठमाडौंका विभिन्न अस्पतालमा उपलब्ध तथा खाली रहेका शय्याको विवरण अद्यावधिक गरिएको छ । विपद्का कारण घाइते तथा बिरामीको संख्या बढ्न सक्ने अवस्थालाई मध्यनजर गर्दै आवश्यकताअनुसार बिरामी व्यवस्थापनको तयारी गरिएको हो ।

त्यस्तै, आपत्कालीन अवस्थामा तत्काल परिचालन गर्न एम्बुलेन्स तथा आवश्यक स्वास्थ्य उपकरण र सेवाका साधनलाई स्ट्यान्डबाइमा राखिएको मन्त्रालयले जनाएको छ ।

सम्भावित विपद्का समयमा स्वास्थ्य सेवा प्रभावित हुन नदिन सम्बन्धित निकायबीचको समन्वयलाई थप प्रभावकारी बनाइएको मन्त्रालयको भनाइ छ ।

हेल्पलाइन सेवा

आपत्कालीन स्वास्थ्यसम्बन्धी सहयोग, जानकारी तथा समन्वय आवश्यक परे मन्त्रालयको हेल्पलाइन १११५ मा सम्पर्क गर्न सर्वसाधारणलाई अनुरोध गरिएको छ ।

मन्त्रालयले विपद्को समयमा आवश्यक पर्ने स्वास्थ्य सेवा तथा समन्वयका लागि हेल्पलाइनलाई सक्रिय राखिएको जनाएको छ ।

Originally published on abcnews.com.np.