सिचुवान : चीनको सीमावर्ती क्षेत्रबाट आएको बाढीले नेपालतर्फ ठूलो क्षति भएपछि चिनियाँ राष्ट्रपति सी चिनफिङले उद्धार तथा राहत कार्यमा लाग्न निर्देशन दिएका छन्। उहाँले बेपत्ता व्यक्तिहरूको खोजी र उद्धार गर्न, खतरामा परेका मानिसहरूलाई स्थानान्तरण र पुनर्स्थापना गर्न, साथै घाइतेहरूको तुरुन्तै उपचार गरी हताहत कम गर्न सक्दो प्रयास गर्न निर्देशन दिनुभएको छ।

राष्ट्रपति सीले अनुगमन तथा प्रारम्भिक चेतावनी प्रणालीलाई बलियो बनाउन, वैज्ञानिक उद्धार प्रयासहरूलाई जोड दिन र दोस्रो प्रकोपहरू रोक्नुपर्ने आवश्यकतामा पनि जोड दिएका छन्। ‘हामी अहिले बाढी रोकथामको लागि एक महत्वपूर्ण समयमा छौं। सबै क्षेत्र र सम्बन्धित विभागहरूले सबै बाढी र आँधीबेहरी रोकथाम उपायहरू इमानदारीपूर्वक लागू गर्नुपर्छ, विभिन्न जोखिम र लुकेका खतराहरूको अनुसन्धान र सुधारलाई बलियो बनाउनुपर्छ, ठूला प्रकोप र दुर्घटनाहरूलाई दृढतापूर्वक रोक्नुपर्छ, र जनताको जीवन र सम्पत्तिको सुरक्षा सुनिश्चित गर्नुपर्छ,’ सीले दिएको निर्देशन सीआरआईले उधृत गरेको छ।

प्रधानमन्त्री ली छियाङको निर्देशन

त्यस्तै चिनियाँ प्रधानमन्त्री ली छियाङले पनि निर्देशन जारी गर्दै बेपत्ता व्यक्ति र विपद् पीडितको संख्या द्रुत रूपमा प्रमाणित गर्न, उद्धार तथा राहत प्रयासहरू सञ्चालन गर्न सेनाहरू व्यवस्थित गर्न र जोखिममा परेका मानिसहरूलाई तुरुन्तै र व्यवस्थित रूपमा स्थानान्तरण गर्न आवश्यक रहेको बताएका छन्।

‘विदेश मन्त्रालयले सम्बन्धित देशहरूसँग सञ्चार र समन्वयलाई सुदृढ पार्नु पर्छ, तुरुन्तै स्थिति रिपोर्ट गर्नुपर्छ, र उद्धार कार्यलाई संयुक्त रूपमा र उचित रूपमा सम्हाल्नु पर्छ,’ प्रधानमन्त्री लीको निर्देशनमा भनिएको छ।

उपप्रधानमन्त्री झाङ गुओकिङको टोली घटनास्थलतर्फ

निर्देशनअनुसार उपप्रधानमन्त्री झाङ गुओकिङले उद्धार तथा राहत प्रयासहरूलाई मार्गदर्शन गर्न सम्बन्धित विभागका अधिकारीहरूलाई घटनास्थलतर्फ खटाएका छन्।

Originally published on abcnews.com.np.