काठमाडौं । सरकारले भोटेकोसी बाढीमा परी घाइते भएकाहरूको निःशुल्क उपचार गर्ने निर्णय गरेको छ ।

बाढीबाट प्रभावित तथा घाइतेको उपचारलाई प्राथमिकतामा राख्दै मन्त्रिपरिषद्को आकस्मिक बैठकले आज यस्तो निर्णय गरेको हो ।

घाइतेहरूको उपचारको आवश्यक व्यवस्था मिलाउने जिम्मेवारी स्वास्थ्य तथा खाद्य स्वच्छता मन्त्रालयलाई दिइएको छ । मन्त्रिपरिषद्को निर्णयअनुसार नेपाली सेना तथा सरकारी अस्पतालले समेत आवश्यक पूर्वतयारीसहित उपचार सेवा उपलब्ध गराउनेछन् ।

उपचारका लागि आवश्यक बजेट व्यवस्था

सरकारले बाढीमा परी घाइते भएका नागरिकको तत्काल उपचारका लागि आवश्यक बजेटको व्यवस्था गर्न सम्बन्धित निकायलाई निर्देशन दिएको छ ।

स्वास्थ्य तथा खाद्य स्वच्छता मन्त्रालयले देशका विभिन्न अस्पतालसँग समन्वय गरी घाइतेलाई आवश्यक स्वास्थ्य सेवा उपलब्ध गराउने तयारी गरेको जनाएको छ ।

बाढी प्रभावित क्षेत्रबाट उद्धार गरिएका घाइतेलाई आवश्यकता र अवस्थाअनुसार नजिकका अस्पताल तथा काठमाडौं उपत्यकाका ठूला अस्पतालमा उपचारको व्यवस्था मिलाइने बताइएको छ ।

Originally published on abcnews.com.np.