काठमाडौं । तिब्बत क्षेत्रबाट त्रिशूली नदी प्रणालीमा आएको विनाशकारी बाढीपछि पत्रकार निराजन पौडेलका बुवा–आमासहित परिवारका पाँच सदस्य सम्पर्कविहीन भएका छन्।

नुवाकोटको बेत्रावतीमा बसोबास गर्दै आएका पत्रकार पौडेलका बुबा बासुदेव पौडेल, आमा, काका, काकी र बहिनी बाढीपछि सम्पर्कबाहिर रहेको बताइएको छ। बाढीले बेत्रावती तथा आसपासका क्षेत्रमा व्यापक क्षति पुर्‍याएपछि परिवारजनको अवस्था अज्ञात बनेको हो।

पत्रकार पौडेलले सामाजिक सञ्जालमार्फत आफ्ना परिवारका सदस्यको खोजी गरिदिन सबैसँग अपिल गरेका छन्।

बासुदेव पौडेल स्थानीय विद्यालयमा शिक्षकका रूपमा कार्यरत छन्। पत्रकार पौडेलका अनुसार विद्यालयमा सम्पर्क गर्दा बुबा नियमित रूपमा हाजिर गरेर त्यहाँबाट निस्किएको जानकारी प्राप्त भएको छ। त्यसपछि भने उनको अवस्थाबारे कुनै जानकारी प्राप्त हुन सकेको छैन।

पत्रकार पौडेलले भने, “हाम्रो सबै परिवारको बेत्रावतीमा बसोबास थियो। स्कुलका शिक्षकलाई सोध्दा बुबाले हाजिर गरेर निस्कनुभएको भन्छन्। यताउता सम्पर्क गर्दा अहिलेसम्म कुनै खबर आएको छैन। मोबाइलमा फोन पनि लागेको छैन।”

उनका अनुसार साँझसम्म आफन्त तथा चिनजानका व्यक्तिबाट समेत परिवारका सदस्यहरूको अवस्थाबारे कुनै ठोस जानकारी प्राप्त भएको छैन।

‘कृपया खोजी गरिदिनुहोस्’

परिवारजनसँग सम्पर्क टुटेपछि पत्रकार पौडेलले सामाजिक सञ्जालमार्फत सार्वजनिक अपिल गरेका छन्।

उनले लेखेका छन्, ‘मेरो परिवार नुवाकोटको बेत्रावतीबाट सम्पर्कविहीन भएको छ। बाढीको कारणले यस्तो हुन सक्ने आशंका छ। कृपया खोजी गरिदिनुहोस्।’

भोटेकोशी–त्रिशूली नदी प्रणालीमा आएको विनाशकारी बाढीले रसुवा, नुवाकोट, धादिङलगायतका क्षेत्रमा ठूलो जनधनको क्षति पुर्‍याएको छ। बाढी प्रभावित क्षेत्रका धेरै नागरिकसँग सञ्चार सम्पर्क टुटेका कारण बेपत्ता तथा सम्पर्कविहीन व्यक्तिहरूको वास्तविक अवस्था यकिन गर्न कठिनाइ भइरहेको छ।

पत्रकार पौडेलको परिवारका पाँच सदस्यको खोजीका लागि स्थानीय प्रशासन, सुरक्षा निकाय तथा प्रभावित क्षेत्रमा परिचालित उद्धार टोलीसँग समन्वय आवश्यक रहेको छ।

Originally published on abcnews.com.np.