काठमाडौं । राष्ट्रपति रामचन्द्र पौडेलले रसुवाको भोटेकोसी नदीमा आएको बाढीमा परेका नागरिकको खोज, उद्धार तथा राहतका लागि राज्यका सबै संयन्त्र परिचालन गर्न प्रधानमन्त्री वालेन्द्र शाहलाई आग्रह गरेका छन्।

बुधबार साँझ प्रधानमन्त्री शाहसँग टेलिफोन कुराकानी गर्दै राष्ट्रपति पौडेलले भोटेकोसीमा आएको बाढीबाट भएको जनधनको क्षतिबारे जानकारी लिँदै उद्धार तथा राहत कार्यलाई तीव्रता दिन आग्रह गरेका हुन्।

राष्ट्रपतिले पीडामा परेका नागरिकको खोज, उद्धार र राहत कार्यलाई प्रभावकारी बनाउन राज्यका सबै अंग परिचालन गर्न आग्रह गरेको उनका प्रेस सल्लाहकार किरण पोखरेलले जानकारी दिए।

टेलिफोन कुराकानीका क्रममा प्रधानमन्त्री शाहले रसुवामा बाढीले पुर्‍याएको जनधनको क्षतिबारे राष्ट्रपतिलाई जानकारी गराएका थिए। नागरिकको उद्धार तथा राहतका लागि सरकारले राज्यका सबै संयन्त्र परिचालन गरी सम्भव भएसम्म सबै सहयोग जुटाउन कुनै कमी नगर्ने प्रधानमन्त्री शाहले बताएका थिए।

यसअघि राष्ट्रपति पौडेलले रसुवा हुँदै बग्ने भोटेकोसी नदीमा बुधबार बिहान अकस्मात आएको बाढीबाट भएको धनजनको क्षतिप्रति दुःख व्यक्त गरेका थिए।

उनले विपद्को यस घडीमा उद्धार तथा राहत कार्यलाई तीव्रता दिन सरकार, राजनीतिक दल, सामाजिक संघसंस्था, सुरक्षा निकायसहित सम्पूर्ण निकाय र आम नागरिकलाई आह्वान गरेका थिए।

राष्ट्रपति पौडेलले भोटेकोसी नदीको तल्लो तटीय क्षेत्रमा बसोबास गर्ने सर्वसाधारणलाई सतर्क रहन तथा आवश्यक समन्वय र सहयोगमा जुट्नसमेत आग्रह गरेका छन्।

Originally published on abcnews.com.np.