काठमाडौं । रसुवाको टिमुरेमा आएको भीषण बाढीले त्यहाँ सञ्चालनमा रहेका ९ वटा बैंकका शाखा कार्यालयमा क्षति पुगेको छ। बाढीले टिमुरे बजार नै प्रभावित बनाएपछि बैंकका शाखा कार्यालयमा समेत ठूलो क्षति भएको प्रारम्भिक जानकारी प्राप्त भएको हो।

नेपाल बैंकर्स संघका अध्यक्ष सन्तोष कोइरालाका अनुसार टिमुरेमा रहेका बैंकका शाखा कार्यालयमा क्षति पुगेको जानकारी प्राप्त भएको छ। बाढीपछि केही कर्मचारीसँग सम्पर्क स्थापित भए पनि अझै केही कर्मचारी सम्पर्कविहीन छन्।

अध्यक्ष कोइरालाले कर्मचारीको अवस्थाबारे जानकारी लिन निरन्तर प्रयास भइरहेको बताए। उनका अनुसार टिमुरे बजार पूर्णरूपमा ध्वस्त भएको जानकारी आएको छ।

बाढीका कारण सञ्चार सम्पर्क प्रभावित हुँदा बैंकका कर्मचारीसँग सम्पर्क गरी शाखाको अवस्था तथा क्षतिको विवरण संकलन गर्न कठिनाइ भइरहेको छ। यद्यपि, अहिले बैंकिङ सम्पत्तिभन्दा कर्मचारीको सुरक्षा र अवस्थाबारे जानकारी लिनु पहिलो प्राथमिकता रहेको संघले जनाएको छ।

अध्यक्ष कोइरालाका अनुसार टिमुरेमा सानिमा बैंक, नेपाल इन्भेस्टमेन्ट मेगा बैंक, नबिल बैंक, लक्ष्मी सनराइज बैंक, ग्लोबल आईएमई बैंक, हिमालयन बैंक, एनएमबी बैंक, प्रभु बैंक र माछापुच्छ्रे बैंकका शाखा रहेका छन्।

बाढीबाट प्रभावित शाखा कार्यालय तथा बैंकिङ पूर्वाधारमा भएको वास्तविक क्षतिको विवरण कर्मचारीसँग सम्पर्क स्थापित भएपछि मात्रै यकिन हुने भएको छ। बैंकर्स संघले सम्बन्धित बैंक तथा कर्मचारीसँग समन्वय गरी अवस्थाबारे जानकारी संकलन गर्ने प्रयास जारी राखेको जनाएको छ।

Originally published on abcnews.com.np.