काठमाडौं । रसुवाको टिमुरे क्षेत्रमा बुधबार बिहान आएको भोटेकोशीको भीषण बाढीले बस्ती, बजार तथा बैंक तथा वित्तीय संस्थाका शाखा कार्यालयमा ठूलो क्षति पुर्‍याएको छ।

बाढीले टिमुरे बजारको ठूलो हिस्सा प्रभावित बनाएपछि त्यहाँ सञ्चालनमा रहेका आधा दर्जनभन्दा बढी बैंकका शाखा कार्यालयसमेत जोखिममा परेका छन्।

टिमुरेमा माछापुच्छ्रे बैंक, सानिमा बैंक, नबिल बैंक, लक्ष्मी सनराइज बैंक, हिमालयन बैंक, एनएमबी बैंक, ग्लोबल आइएमई बैंक र नेपाल इन्भेष्टमेन्ट मेगा बैंकलगायतका बैंक तथा वित्तीय संस्थाका शाखा कार्यालय रहेका थिए।

बस्ती तथा बजार क्षेत्र नै बाढीको चपेटामा परेपछि शाखा कार्यालयको अवस्था र भौतिक क्षतिको विवरण तत्काल संकलन गर्न कठिनाइ भइरहेको नेपाल बैंकर्स संघले जनाएको छ।

बाढीपछि टिमुरे क्षेत्रमा सञ्चार सम्पर्कसमेत अवरुद्ध भएको छ। टेलिफोनलगायत सञ्चार माध्यमबाट कर्मचारीसँग सम्पर्क हुन नसक्दा शाखाको अवस्था तथा कर्मचारीको सुरक्षाबारे तत्काल जानकारी लिन समस्या भइरहेको संघले जनाएको छ।

कर्मचारी उद्धार प्राथमिकतामा

बाढीपछि बैंकर्स संघले बुधबार नै आकस्मिक बैठक बोलाएर प्रभावित क्षेत्रमा रहेका बैंकका कर्मचारीको उद्धार तथा सुरक्षालाई प्राथमिकतामा राख्ने निर्णय गरेको छ।

बैंकर्स संघका अध्यक्ष सन्तोष कोइरालाका अनुसार कर्मचारीको उद्धारका लागि नेपाली सेना, नेपाल प्रहरीलगायत सम्बन्धित निकायसँग समन्वय भइरहेको छ।

‘अहिले प्राथमिकता प्रभावित क्षेत्रमा रहेका कर्मचारीको उद्धार र सुरक्षालाई दिइएको छ,’ उनले भने।

सञ्चार तथा भौतिक पहुँच सहज भएपछि मात्रै शाखा कार्यालय, बैंकिङ उपकरण, कागजात तथा अन्य संरचनामा भएको क्षतिको विस्तृत विवरण संकलन गर्न सकिने संघले जनाएको छ।

टिमुरेको जनजीवन प्रभावित

भोटेकोशीमा आएको बाढीले टिमुरे क्षेत्रका बस्ती, बजार तथा विभिन्न पूर्वाधारमा ठूलो क्षति पुर्‍याएपछि स्थानीय जनजीवनसमेत प्रभावित भएको छ।

बैंक तथा वित्तीय संस्थाका शाखामा भएको वास्तविक क्षतिको विवरण भने सम्बन्धित बैंकको टोली प्रभावित क्षेत्रमा पुगेर निरीक्षण गरेपछि मात्रै यकिन हुने देखिएको छ।

Originally published on abcnews.com.np.