काठमाडौँ । मध्यनेपालमा पानी पार्ने बादल घना रहेकाले भोटेकोशी बाढी प्रभावित क्षेत्रमा उद्धार कार्य गर्दा विशेष सावधानी अपनाउन जल तथा मौसम विज्ञान विभागले आग्रह गरेको छ।

बुधबार तिब्बत क्षेत्रमा गएको ठूलो हिमपहिरोपछि भोटेकोशी नदीमा आएको बाढीले प्रभावित क्षेत्रमा उद्धार तथा खोजी कार्य जारी रहेकाले उद्धारमा खटिएका सुरक्षाकर्मी तथा अन्य टोलीलाई मौसमसम्बन्धी सूचना बुझेर मात्रै काम गर्न विभागले अनुरोध गरेको हो।

मौसमविद् सञ्जीव अधिकारीका अनुसार बिहीबार दिनभर सामान्य बदलीसँगै घाम लाग्ने सम्भावना रहे पनि राति वर्षाको सम्भावना बढी छ।

उनले भने, “आज दिनभरजसो सामान्य बदलीसँगै घाम लाग्नेछ, तर राति पानी पर्ने सम्भावना बढी छ। उद्धारमा खटिएकाले ध्यान राख्नुहोला, अर्को विपतमा परिनसक्छ।”

कोशी र वाग्मतीमा बढी वर्षाको सम्भावना

मौसमविद् अधिकारीका अनुसार कोशी र वाग्मती प्रदेशमा अन्य क्षेत्रको तुलनामा बढी वर्षा हुने सम्भावना छ। विशेषगरी दिनको तुलनामा राति वर्षा गराउने बादल बढी सक्रिय हुने भएकाले जोखिमयुक्त क्षेत्रमा रहेका नागरिक तथा उद्धार टोलीले सुरक्षित स्थानमा रहनुपर्ने उनले बताए।

भोटेकोशी बाढीबाट क्षतिग्रस्त क्षेत्रमा थप वर्षा हुँदा पुनः बाढी तथा पहिरोको जोखिम बढ्न सक्ने भन्दै मौसम पूर्वानुमान महाशाखाले सतर्कता अपनाउन आग्रह गरेको छ।

दिनभर कोशी प्रदेशमा बदली र वर्षाको क्रम रहने तथा राति वर्षाको प्रणाली वाग्मती प्रदेशतर्फ केन्द्रित हुनसक्ने भएकाले सरकार तथा उद्धारमा खटिएका सबै निकायले मौसमको अवस्थालाई निरन्तर निगरानी गर्नुपर्ने मौसमविद् अधिकारीले बताएका छन्।

Originally published on abcnews.com.np.