काठमाडौं । रसुवाको भोटेकोशी बाढी प्रभावितका नाममा जथाभावी आर्थिक सहयोग संकलन नगर्न सरकारले चेतावनी दिएको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले बुधबार विज्ञप्ति जारी गर्दै केही व्यक्ति तथा समूहले बाढीपीडितको राहतका लागि भन्दै आर्थिक सहयोग संकलन गर्न थालेको र नगद सहयोगका लागि क्यूआर कोडसमेत सामाजिक सञ्जालमा सार्वजनिक गरिरहेको जानकारी प्राप्त भएको जनाएको छ।

प्राधिकरणका अनुसार बुधबार बिहान ८ः४० बजे रसुवाको भोटेकोशी नदीमा आएको ठूलो बाढीले भोटेकोशी तथा त्रिशूली नदी किनारमा मानवीय तथा भौतिक क्षति पुर्‍याएको छ। प्रभावित तथा अलपत्र परेकाको खोजी तथा उद्धार कार्य जारी छ।

विपद्को संवेदनशील अवस्थाको फाइदा उठाउँदै राहतका नाममा अनधिकृत रूपमा रकम संकलन हुनसक्ने भन्दै प्राधिकरणले सचेत गराएको हो।

प्राधिकरणले नेपाल सरकारले आह्वान गरेबाहेक कुनै पनि व्यक्ति वा संस्थालाई आर्थिक सहयोग नगर्नसमेत सर्वसाधारणलाई अनुरोध गरेको छ।

अनधिकृत चन्दा उठाएको थाहा पाए खबर गर्न आग्रह

बाढी प्रभावितका नाममा अनधिकृत रूपमा आर्थिक सहयोग संकलन भइरहेको जानकारी पाए तत्काल प्राधिकरणमा खबर गर्न आग्रह गरिएको छ।

त्यसका लागि राष्ट्रिय विपद् जोखिम न्यूनीकरण तथा व्यवस्थापन प्राधिकरणको ०१–४२१११९७ नम्बरमा सूचना दिन सकिनेछ।

प्राधिकरणकी प्रवक्ता उपसचिव शान्ति महतद्वारा जारी विज्ञप्तिमा उद्धार तथा राहत कार्यलाई व्यवस्थित र प्रभावकारी बनाउन आधिकारिक संयन्त्रमार्फत मात्र सहयोग गर्न आग्रह गरिएको छ।

प्राधिकरणले विपद्का बेला सामाजिक सञ्जालमा सार्वजनिक हुने अपुष्ट क्यूआर कोड, बैंक खाता वा अन्य माध्यममा रकम पठाउनुअघि त्यसको आधिकारिकता पुष्टि गर्नसमेत आग्रह गरेको छ।

Originally published on abcnews.com.np.