काठमाडौँ । अग्रगामी मोर्चाले सरकारसँग समन्वय गरी भोटेकोसी बाढी प्रभावित क्षेत्रमा उद्धार तथा राहत कार्यमा सहकार्य गर्ने निर्णय गरेको छ।

मोर्चाको आज बसेको बैठकले उद्धारका लागि अग्रगामी युवा मोर्चाको नेतृत्वमा आवश्यक जनशक्ति परिचालन गर्ने निर्णय गरेको प्रवक्ता डा. सिके राउतले जानकारी दिए।

बैठकले राहत सामग्री तथा आर्थिक सहयोग संकलन गरी एकमुष्ट रूपमा सरकारलाई हस्तान्तरण गर्ने निर्णयसमेत गरेको छ।

घाइतेहरूको उपचारका लागि आवश्यक जनशक्ति तथा उपचार सामग्री व्यवस्थापन गर्न डम्मर रावलको नेतृत्वमा ‘घाइते उपचारार्थ सहयोग समूह’ गठन गर्ने निर्णय भएको राउतले बताए। समूहमा मोर्चामा आबद्ध सबै दलबाट एक–एक जना सदस्य रहनेछन्।

पुनर्निर्माणमा पनि सहकार्य

मोर्चाले रसुवालगायत बाढीबाट प्रभावित क्षेत्रमा भौतिक संरचनाको पुनर्निर्माण तथा पीडितको पुनर्स्थापनाका लागि सरकारसँग सहकार्य गर्ने जनाएको छ।

पुनर्निर्माण तथा पुनर्स्थापनाका काममा आवश्यक सम्पूर्ण सहयोग गर्ने प्रतिबद्धता पनि मोर्चाले जनाएको छ।

आर्थिक सहयोग जुटाउने

मोर्चाले विपद् प्रभावितका लागि आर्थिक सहयोग जुटाउन अभियान सञ्चालन गर्ने भएको छ। सदस्य तथा शुभचिन्तकबाट सहयोग संकलन गरी सरकारलाई हस्तान्तरण गर्ने र राहत वितरणमा सहजीकरण गर्ने योजना रहेको प्रवक्ता राउतले बताए।

संकलित रकम बाढी तथा पहिरोबाट प्रभावित नागरिकको राहत र उपचारमा खर्च गरिने मोर्चाले जनाएको छ।

Originally published on abcnews.com.np.