काठमाडौं । भोटेकोशी बाढीपछि उद्धार तथा राहत कार्यका लागि निजी क्षेत्रबाट बिहीबार साँझसम्म ४६ करोड ५० लाख रुपैयाँ सहयोग प्राप्त भएको छ।

विभिन्न उद्योग, बैंक, वित्तीय संस्था तथा व्यावसायिक घरानाले प्रधानमन्त्री दैवीप्रकोप उद्धार कोषमा रकम जम्मा गर्ने घोषणा गरेका छन्। अर्थ मन्त्रालयका अनुसार पछिल्लो ६ घण्टामा मात्रै विभिन्न उद्योग तथा बैंक–वित्तीय संस्थाबाट २७ करोड ३३ लाख रुपैयाँभन्दा बढी सहयोग प्राप्त भएको हो।

गोर्खा ब्रुअरीले सबैभन्दा धेरै १० करोड रुपैयाँ सहयोग गरेको छ। बीवाईडी र यसको आधिकारिक वितरक साइमेक्स इंकले ७ करोड तथा स्वतन्त्र ऊर्जा उत्पादकहरूको संस्था नेपाल (इप्पान) ले सम्बद्ध जलविद्युत् कम्पनीमार्फत ५ करोड ५ लाख ५० हजार रुपैयाँ सहयोग गर्ने निर्णय गरेका छन्।

गोर्खा ब्रुअरीका प्रबन्ध निर्देशक अरुण अधिकारी, वित्त निर्देशक अमर वैद्य र बजार निर्देशक काजीमन सुब्बाले अर्थमन्त्री डा. स्वर्णिम वाग्लेलाई भेटेर सहयोग रकम हस्तान्तरण गरेका छन्।

बैंक तथा वित्तीय संस्थाको सहयोग

नेपाल बैंकले ३ करोड १ लाख, कुमारी बैंक र राष्ट्रिय वाणिज्य बैंकले ३/३ करोड रुपैयाँ सहयोग गरेका छन्। नेपाल इन्फ्रास्ट्रक्चर बैंक (निफ्रा) ले २ करोड ५० लाख तथा एनआईसी एसिया बैंकले २ करोड २१ लाख रुपैयाँ सहयोग गरेका छन्।

सानिमा बैंकले सवा दुई करोड र सारस बेभरेज (रेडबुल) ले २ करोड रुपैयाँ सहयोग गरेका छन्। गोल्छा ग्रुपले डेढ करोड रुपैयाँ सहयोग गरेको छ।

कालिका कन्स्ट्रक्सनले १ करोड १ लाख, एनसेलले १ करोड तथा आईएमई लाइफ इन्स्योरेन्सले १ करोड रुपैयाँ सहयोग गर्ने घोषणा गरेका छन्।

अन्य संस्थाको योगदान

अपि पावर कम्पनीले ३५ लाख रुपैयाँ तत्काल सहयोग उपलब्ध गराएको छ। शिवशक्ति ग्रुपले ५१ लाख तथा हिमालयन बुलियन कम्पनीले २१ लाख रुपैयाँ सहयोग गरेका छन्।

रिलायन्स सुगर एन्ड केमिकल इन्डस्ट्रिज, मेगा मोटर्स, नाडा अटोमोबाइल्स एसोसिएसन अफ नेपाल र नेपाल लेयर्स कुखुरा पालक संघले १०/१० लाख रुपैयाँ सहयोग गरेका छन्।

एकद्वार प्रणालीबाट राहत परिचालन

बाढी प्रभावित क्षेत्रमा राहत, उद्धार, खोज तथा पुनःस्थापनाका लागि प्राप्त सहयोग एकद्वार प्रणालीबाट परिचालन गर्ने व्यवस्था गरिएको छ। सहयोग रकम अर्थमन्त्री डा. स्वर्णिम वाग्लेले बुझ्ने व्यवस्था मिलाइएको छ।

बाढीपीडितका लागि सहयोग गर्न चाहने अन्तर्राष्ट्रिय दाताका लागि सरकारले बिहीबार छुट्टै भुक्तानी पोर्टलसमेत सार्वजनिक गरेको छ।

यसअघि बुधबार साँझ प्रधानमन्त्री बालेन्द्र शाहले स्वदेश तथा विदेशमा रहेका सामाजिक संघसंस्था, उद्योगी–व्यवसायी, युवा स्वयंसेवक तथा आम नागरिकलाई उद्धार तथा राहत अभियानमा सहयोग गर्न अपिल गरेका थिए।

Originally published on abcnews.com.np.