नवलपरासी (बर्दघाट सुस्तापूर्व) । देवचुली नगरपालिकाले भोटेकोशी नदीमा आएको बाढीबाट प्रभावित नागरिकको उद्धार तथा राहतका लागि ८ लाख रुपैयाँ सहयोग गर्ने भएको छ।

नगर कार्यपालिकाको बिहीबार बसेको बैठकले प्रधानमन्त्री दैवी प्रकोप उद्धार कोषमा ४ लाख रुपैयाँ र जनप्रतिनिधि तथा कर्मचारीको तर्फबाट थप ४ लाख रुपैयाँ गरी कुल ८ लाख रुपैयाँ सहयोग गर्ने निर्णय गरेको मेयर हरिप्रसाद न्यौपानेले जानकारी दिए।

भोटेकोशी नदीमा आएको बाढी तथा पहिरोबाट भएको मानवीय र भौतिक क्षतिप्रति दुःख व्यक्त गर्दै नगरपालिकाले नेपाल सरकारले सञ्चालन गरिरहेको उद्धार तथा राहत अभियानमा सहकार्य गर्ने निर्णय गरेको हो।

मेयर न्यौपानेले विपद्को यस कठिन घडीमा प्रभावित परिवारलाई आवश्यक सहयोग उपलब्ध गराउन तथा विपद् व्यवस्थापनका कार्यमा सहकार्य गर्न आग्रह गरेका छन्।

नगरपालिकाले बाढीमा परी ज्यान गुमाएकाप्रति श्रद्धाञ्जली व्यक्त गर्दै शोकसन्तप्त परिवारजनप्रति समवेदना तथा घाइतेहरूको शीघ्र स्वास्थ्यलाभको कामना गरेको छ। सहयोग रकम तत्काल बाढी प्रभावित क्षेत्रमा राहत तथा उद्धारका लागि परिचालन गरिने नगरपालिकाले जनाएको छ।

Originally published on abcnews.com.np.