काठमाडौँ । जल तथा मौसम विज्ञान विभागअन्तर्गतको बाढी पूर्वानुमान महाशाखाले भोटेकोसी नदीको तल्लो तटीय क्षेत्रमा फेरि बाढीको जोखिम रहेको भन्दै विशेष सतर्कता अपनाउन आग्रह गरेको छ।

महाशाखाले शुक्रबार सूचना जारी गर्दै भदौ १० गते बाढी आएको स्थानमा नदी थुनिएर ठूलो ताल बनेको र उक्त ताल फुट्ने जोखिम रहेकाले भोटेकोसी नदीको तल्लो तटीय क्षेत्रका नागरिकलाई उच्च सतर्कता अपनाउन आग्रह गरेको हो।

महाशाखाका अनुसार २०८३ भदौ १० गते रसुवामा भोटेकोसी नदीमा आएको बाढीपछि हाल भोटेकोसी र त्रिशूली नदीको बहाव सतर्कता तहभन्दा तल रहेको छ। यद्यपि नदी थुनिएर बनेको ताल फुट्न सक्ने जोखिमका कारण तल्लो तटीय क्षेत्रमा उच्च सतर्कता आवश्यक रहेको महाशाखाले जनाएको छ।

चीन सरकारबाट प्राप्त सूचना, भूउपग्रह तस्बिर तथा प्रारम्भिक विश्लेषणका आधारमा बाढी सिर्जना भएको स्थानमा नदी थुनिएर ताल बनेको र तालको पानीको सतह बढिरहेको पाइएको महाशाखाले जनाएको छ।

ताल फुटेमा भोटेकोसी नदीको तल्लो तटीय क्षेत्रमा अचानक ठूलो बाढी आउन सक्ने जोखिम रहेकाले अर्को सूचना जारी नभएसम्म नदी किनार तथा जोखिमयुक्त क्षेत्रका बासिन्दालाई सुरक्षित स्थानमा बस्न अनुरोध गरिएको छ।

महाशाखाले यात्रु, उद्धार कार्यमा खटिनुभएका उद्धारकर्ता तथा सम्बन्धित सबैलाई समेत विशेष सतर्कता अपनाउन आग्रह गरेको छ।

शिरमा २० लाख घनमिटर पानीको ताल

चीनको जलस्रोत मन्त्रालयबाट प्राप्त जानकारीअनुसार भोटेकोसी नदीको शिरतर्फ खोला थुनिएर करिब २० लाख घनमिटर पानीको ताल बनेको छ।

महाशाखाले चीन सरकारबाट प्राप्त उक्त जानकारीलाई गम्भीरतापूर्वक लिँदै तल्लो तटीय क्षेत्रमा आवश्यक सतर्कता अपनाउन अनुरोध गरेको जनाएको छ।

Originally published on abcnews.com.np.