काठमाडौं । रसुवा बाढीका कारण विभिन्न स्थानमा फसेका नागरिकमध्ये हालसम्म तीन हजार २५३ जनाको उद्धार गरिएको सरकारले जनाएको छ।

सरकारका प्रवक्तासमेत रहेका शिक्षा तथा खेलकुदमन्त्री सस्मित पोखरेलले उद्धार कार्यलाई सरकारले उच्च प्राथमिकतामा राखेर तीव्र रूपमा अघि बढाइएको जानकारी दिएका हुन्।

उनका अनुसार उद्धारका लागि नेपाली सेनाका ६ वटा र निजी क्षेत्रका ९ वटा गरी कुल १५ वटा हेलिकप्टर परिचालन गरिएको छ। दुर्गम तथा सडक सम्पर्क टुटेका क्षेत्रमा हेलिकप्टरमार्फत फसेका नागरिकको उद्धार जारी रहेको उनले बताए।

यस्तै, प्रभावित क्षेत्रमा राहत सामग्री पठाउने काम पनि तीव्र पारिएको सरकारको भनाइ छ। हाल १० ट्रकभन्दा बढी राहत सामग्री बाढी प्रभावित क्षेत्रमा पठाइएको मन्त्री पोखरेलले जानकारी दिए।

सरकारले अहिलेको मुख्य प्राथमिकता खोज तथा उद्धार कार्य रहेको जनाएको छ। उद्धारपछि प्रभावित नागरिकका लागि खाद्यान्न, अस्थायी आवास, स्वास्थ्य उपचार तथा अन्य आवश्यक राहत सामग्रीको व्यवस्थापनमा पनि सम्बन्धित निकायहरू परिचालित रहेको बताइएको छ।

Originally published on abcnews.com.np.