काठमाडौं । नेपाल कम्युनिस्ट पार्टी (बहुमत) ले अध्यक्ष मण्डलका सदस्य गुणराज लोहनी ‘प्रवीर’ लाई पार्टीको साधारण सदस्यसमेत नरहने गरी निष्कासन गरेको छ।

पार्टी अध्यक्ष मण्डलले लोहनीमाथि पार्टी अनुशासन र मर्यादा उल्लंघन गरेको आरोप लगाउँदै सम्पूर्ण जिम्मेवारीबाट हटाउने निर्णय गरेको जनाएको छ।

पार्टीका अनुसार धर्मेन्द्र बास्तोलाको अध्यक्षतामा बसेको अध्यक्ष मण्डलको बैठकमा छलफल भइरहेका बेला लोहनीले अध्यक्षमाथि अमर्यादित ढंगले गालीगलौज गरेका थिए। उक्त व्यवहार पार्टीको मर्यादा, अनुशासन तथा अध्यक्ष मण्डलका सदस्यको जिम्मेवारीविपरीत रहेको निष्कर्षपछि कारबाही गरिएको विज्ञप्तिमा उल्लेख छ।

लोहनीमाथि यसअघि पनि पार्टी अध्यक्ष तथा केही सदस्यविरुद्ध पटक–पटक अमर्यादित अभिव्यक्ति दिने, गालीगलौज गर्ने, हुलहुज्जत गर्ने तथा गुटबन्दीमा संलग्न हुने गरेको आरोप लगाइएको छ।

यस्ता गतिविधिले पार्टीभित्र अनुशासनहीनता बढाउने, आन्तरिक विवाद चर्काउने र संगठनलाई कमजोर बनाउने खतरा बढाएको पार्टीको निष्कर्ष छ।

पार्टीले यसअघि उनलाई पटक–पटक सम्झाउने, चेतावनी दिने, आत्मालोचना गर्न लगाउने तथा निलम्बनसम्मका कारबाहीमार्फत व्यवहार सुधार्ने प्रयास गरिएको जनाएको छ। तर, ती प्रयास प्रभावकारी नभएको र पछिल्लो बैठकमा समेत गम्भीर अनुशासन उल्लंघन भएको आरोप लगाइएको छ।

लिखित आत्मालोचना गर्न दिइएको निर्देशनसमेत अस्वीकार गरेपछि अध्यक्ष मण्डलले लोहनीलाई पार्टीको साधारण सदस्यसमेत नरहने गरी निष्कासन गर्ने निर्णय गरेको जनाएको छ।

Originally published on abcnews.com.np.