काठमाडौं । भोटेकोशी बाढीमा परी बेपत्ता भएका रसुवास्थित प्रहरी चौकी बेत्रावतीमा कार्यरत प्रहरी सहायक निरीक्षक (असई) रामकाजी पौडेलको शव फेला परेको छ।

चितवनमा फेला परेको शव पौडेलकै भएको उनका आफन्तले सनाखत गरेपछि बुझेर लगेका प्रहरीले जनाएको छ। भदौ १० गते भोटेकोशीमा आएको विनाशकारी बाढीपछि पौडेल बेपत्ता भएका थिए।

बाढी आउँदा पौडेलसहित प्रहरी टोली प्रभावित क्षेत्रमा उद्धार तथा सूचना प्रवाहमा खटिएको थियो। चौकीमा कार्यरत केही प्रहरी भने बाढीबाट भागेर ज्यान जोगाउन सफल भएका थिए।

पौडेलसँगै बाढीको जोखिमबारे माइकिङ गर्दै हिँडेका प्रहरी सहायक हवल्दार सन्तोष रिजालले पनि बाढीबाट भागेर ज्यान जोगाएका थिए। रिजालले पौडेल भने बाढीमा परेको बताएका थिए।

बाढीपछि बेपत्ता भएका सुरक्षाकर्मी तथा सर्वसाधारणको खोजी जारी रहेकै बेला पौडेलको शव चितवनमा फेला परेको हो।

Originally published on abcnews.com.np.