काठमाडौं । त्रिशूली–३ ‘ए’ जलविद्युत् आयोजनाको सुरुङमा फसेका व्यक्तिको उद्धारका लागि महत्वपूर्ण प्रगति भएको गृहमन्त्री सुदन गुरुङले बताएका छन्।

बाढी प्रभावित क्षेत्रमा खोज तथा उद्धारमा खटिएका गृहमन्त्री गुरुङका अनुसार उद्धार टोली सुरुङको माथिल्लो भाग (क्राउन) सम्म पुग्न सफल भएको छ। त्यहाँबाट सुरुङभित्र सानो प्वाल बनाएर हावा पठाउन सुरु गरिएको उनले जानकारी दिएका छन्।

गृहमन्त्री गुरुङले सामाजिक सञ्जालमार्फत सुरुङको माथिल्लो भागसम्म पहुँच स्थापित भएको र अब थप खन्ने काम सुरु गरी उद्धार टोलीलाई सुरुङभित्र पठाउने तयारी भइरहेको बताएका हुन्।

‘हामी सुरुङको माथिल्लो भाग (क्राउन) सम्म पुग्न सफल भएका छौँ। उक्त सानो प्वालबाट हावा पठाउन सुरु गरिसकेका छौँ। अब खन्ने काम सुरु गरी उद्धार टोली पनि भित्र पठाउने छौँ,’ उनले भनेका छन्।

सुरुङभित्र फसेका व्यक्तिको जीवनरक्षालाई प्राथमिकतामा राखेर उद्धार कार्यलाई तीव्र बनाइएको गृहमन्त्री गुरुङले बताएका छन्। सुरुङभित्र हावा पठाउन सुरु हुनुलाई उद्धार अभियानको महत्वपूर्ण प्रगति मानिएको छ।

अब सुरुङको माथिल्लो भागबाट थप सुरक्षित रूपमा खन्ने काम अघि बढाइने र उद्धार टोलीलाई भित्र पठाएर फसेका व्यक्तिको उद्धार गर्ने तयारी गरिएको छ।

यसैबीच, बाढी तथा पहिरोबाट प्रभावित विभिन्न क्षेत्रमा नेपाली सेना, नेपाल प्रहरी र सशस्त्र प्रहरी बलका उद्धार टोली परिचालन गरी खोज तथा उद्धार कार्य जारी छ।

जोखिममा रहेका नागरिकको उद्धार, बेपत्ताको खोजी तथा प्रभावितलाई सुरक्षित स्थानमा स्थानान्तरण गर्ने कार्यलाई प्राथमिकता दिइएको छ।

गृहमन्त्री गुरुङ प्रभावित क्षेत्रमा पुगेर उद्धार कार्यको स्थलगत अनुगमन तथा सुरक्षा निकायका उद्धार टोलीसँग समन्वय गरिरहेका छन्। उनले उद्धारमा खटिएका सुरक्षाकर्मीको अवस्थाबारे जानकारी लिनुका साथै प्रभावित नागरिकसँग भेट गरी तत्काल गर्नुपर्ने कामबारे सम्बन्धित निकायलाई निर्देशन दिइरहेका छन्।

त्रिशूली–३ ‘ए’ सुरुङको माथिल्लो भागसम्म पहुँच पुगेर हावा पठाउने व्यवस्था मिलाइनुलाई उद्धार अभियानमा महत्वपूर्ण उपलब्धिका रूपमा लिइएको छ। अब सुरुङ खन्ने कार्यलाई सुरक्षित रूपमा अघि बढाएर उद्धार टोली भित्र पठाउने र फसेका व्यक्तिको उद्धार गर्ने प्रयास भइरहेको छ।

Originally published on abcnews.com.np.