काठमाडौं । अमेरिकी सरकारले नेपालका बाढीपीडितका लागि ३६ लाख अमेरिकी डलरभन्दा बढीको अतिरिक्त मानवीय सहायता उपलब्ध गराउने घोषणा गरेको छ।

अमेरिकी विदेश मन्त्रालयले शनिबार जारी गरेको प्रेस विज्ञप्तिमार्फत नेपाली जनता कठिन परिस्थितिबाट गुज्रिरहेका बेला अमेरिकाले साथ दिँदै जीवनरक्षक मानवीय सहायता उपलब्ध गराउन लागेको जनाएको हो।

अमेरिकी विदेश मन्त्रालयका अनुसार उक्त सहयोगअन्तर्गत तीन महिनासम्म १० हजार बाढीपीडितलाई खाद्य सामग्री उपलब्ध गराइनेछ।

भोटेकोशीमा आएको विनाशकारी बाढीबाट रसुवा, नुवाकोट, धादिङलगायतका जिल्लामा ठूलो जनधनको क्षति भएपछि अन्तर्राष्ट्रिय समुदायबाट नेपालका लागि राहत तथा मानवीय सहयोग घोषणा भइरहेका बेला अमेरिकाले थप सहायता घोषणा गरेको हो।

अमेरिकी सहयोग बाढी प्रभावित नागरिकको तत्कालीन मानवीय आवश्यकता पूरा गर्न तथा जीवनरक्षाका लागि परिचालन गरिने जनाइएको छ।

Originally published on abcnews.com.np.