नारायणगढ । रसुवाको भोटेकोशी क्षेत्रमा आएको बाढीमा परी मृत्यु भएकाहरूको शव खोजी, परीक्षण तथा व्यवस्थापनको काम चितवनमा तीव्र पारिएको छ। जिल्लाका सुरक्षा निकाय नेपाली सेना, सशस्त्र प्रहरी र नेपाल प्रहरी शव खोजी तथा व्यवस्थापनमा निरन्तर खटिएका छन्।

जिल्ला प्रहरी कार्यालय चितवनका प्रहरी उपरीक्षक रामेश्वर पौडेलका अनुसार शुक्रबार मध्यरातसम्म नारायणी नदीका विभिन्न स्थानबाट २५९ शव फेला परेका छन्।

नदीमा फेला परेका शव भरतपुर अस्पतालमा ल्याएर पोस्टमार्टम तथा अन्य परीक्षण गर्ने गरिएको छ। पहिचान हुन नसकेका शवलाई भने आवश्यक प्रक्रिया पूरा गरी जमिनमुनि व्यवस्थापन गर्ने काम भइरहेको छ। शुक्रबार रातिसम्म करिब एक सय शव व्यवस्थापन गरिएको प्रहरी उपरीक्षक पौडेलले जानकारी दिए।

फेला परेका शवमध्ये हालसम्म नौ जनाको सनाखत भएको छ।

चितवनका प्रमुख जिल्ला अधिकारी गणेश अर्यालका अनुसार शव व्यवस्थापन वैज्ञानिक विधि तथा अन्तर्राष्ट्रिय रेडक्रसले तोकेको मापदण्डअनुसार भइरहेको छ।

व्यवस्थापन गरिएका शवलाई डेढ मिटर गहिरो खाल्डोमा करिब ४० सेन्टिमिटरको फरकमा राखिएको छ। प्रत्येक शवको पहिचानका लागि कोड नम्बर राखिएको छ। सोही नम्बर शवमा र जमिनको माथिल्लो भागमा समेत राखिएको छ।

भविष्यमा परिवारजनले शव पहिचान गरेमा सहज रूपमा उत्खनन गरी बुझाउन सकिने गरी व्यवस्थापन गरिएको प्रमुख जिल्ला अधिकारी अर्यालले बताए।

शव व्यवस्थापन गर्नुअघि सबै शव तथा शवका अवशेषको भरतपुर अस्पतालमा पोस्टमार्टम भइरहेको छ। विज्ञ टोलीले शवको पोस्टमार्टमसँगै डीएनए परीक्षण तथा औँठाछाप लिने कामसमेत गरिरहेको छ।

भरतपुर अस्पतालका मेडिकल सुपरिटेन्डेन्ट डा. विश्व बगालेका अनुसार अस्पतालका विज्ञ समूहसँगै अन्य जिल्लाबाट आएका विशेषज्ञसमेत शव परीक्षणमा खटिएका छन्।

उनका अनुसार शव परीक्षण तथा व्यवस्थापनको काम आइतबारसम्म सम्पन्न गर्ने लक्ष्य राखिएको छ।

यसअघि जिल्ला प्रशासन कार्यालय चितवनले शनिबार पहिचान हुन नसकेका तथा बेवारिसे शव व्यवस्थापनसम्बन्धी निर्देशिकाअनुसार शव व्यवस्थापन गर्ने निर्णय गरेको थियो।

बाढीपछि नारायणी नदीमा बगेर आएका शव चितवनका विभिन्न स्थानमा फेला पर्ने क्रम जारी रहेकाले खोजी, पहिचान, परीक्षण र व्यवस्थापनको कामलाई सुरक्षा निकाय तथा स्वास्थ्यकर्मीले निरन्तरता दिइरहेका छन्।

Originally published on abcnews.com.np.