काठमाडौं । चीनको तिब्बतस्थित केरुङ क्षेत्रमा आएको बाढी तथा पहिरोमा परी बेपत्ता भएका ५४६ जनामध्ये २६१ जना विदेशी नागरिक रहेको चिनियाँ सरकारी सञ्चारमाध्यमले जनाएको छ।

चिनियाँ विदेश मन्त्रालय, जनसुरक्षा, संस्कृति तथा पर्यटन र आपत्कालीन व्यवस्थापनसम्बन्धी निकायले संयुक्त रूपमा गरेको छानबिनपछि विदेशी नागरिकको विवरण सार्वजनिक गरिएको हो। चीनले सम्बन्धित देशका दूतावास तथा कूटनीतिक नियोगलाई बेपत्ता नागरिकबारे आधिकारिक जानकारी गराइसकेको जनाएको छ।

चीन सरकारका अनुसार बेपत्ता विदेशी नागरिकमध्ये नेपालका १०४ जना र भारतका ४९ जना रहेका छन्। त्यस्तै लात्भियाका ३३, अमेरिकाका १८, बेलायतका १५, अस्ट्रेलिया र क्यानडाका ६–६ तथा दक्षिण अफ्रिकाका चार जना रहेका छन्।

मलेसिया, जर्मनी र रुसका तीन–तीन जना तथा आयरल्यान्ड, एस्टोनिया, फ्रान्स, नेदरल्यान्ड्स र न्युजिल्यान्डका दुई–दुई जना बेपत्ता रहेको विवरणमा उल्लेख छ।

त्यस्तै फिनल्यान्ड, लिथुआनिया, पोर्चुगल, युक्रेन, स्पेन र हङ्गेरीका एक–एक जना नागरिक बेपत्ता रहेको चीन सरकारले जनाएको छ।

चिनियाँ अधिकारीका अनुसार विपद्मा परी अहिलेसम्म १६ जनाको मृत्यु भएको छ।

सञ्चार सम्पर्क विच्छेद हुनुका साथै हिमाली क्षेत्रमा सडक तथा अन्य भौतिक संरचना क्षतिग्रस्त भएकाले खोज तथा उद्धार कार्यमा कठिनाइ भइरहेको अधिकारीहरूले बताएका छन्। उद्धार टोलीले ड्रोन प्रविधिसमेत प्रयोग गर्दै चौबिसै घण्टा खोजी तथा उद्धार कार्य जारी राखेको जनाइएको छ।

Originally published on abcnews.com.np.