काठमाडौं । भोटेकोसी नदीमा आएको बाढीका कारण पुलहरूमा ठूलो क्षति भएपछि नेपालले भारत र चीनसँग ४२ वटा बेलिब्रिज माग गरेको छ।

भदौ १० गते रसुवाको भोटेकोसी नदीमा आएको बाढीले रसुवा, नुवाकोट र धादिङमा ४१ वटा पुल पूर्ण रूपमा क्षति गरेको थियो। पुलहरू बगाएपछि विभिन्न स्थानको सडक सम्पर्कसमेत टुटेको छ।

तत्काल सडक सम्पर्क जोड्न आवश्यक पर्ने भएकाले सरकारले दुई छिमेकी मुलुकसँग बेलिब्रिज माग गरेको परराष्ट्र मन्त्रालय स्रोतले जनाएको छ।

‘हामीले चीन र भारतसँग तत्काल नभई नहुने ४२ वटा बेलिब्रिज मागेका छौँ। हामीले जति सक्नुहुन्छ त्यतिवटा उपलब्ध गराउनोस् भनेका छौँ,’ परराष्ट्र मन्त्रालय स्रोतले भन्यो।

पक्की पुल निर्माण गर्न लामो समय लाग्ने भएकाले तत्कालका लागि बेलिब्रिज आवश्यक परेको स्रोतको भनाइ छ।

‘पक्की पुल बनाउन समय लाग्छ। त्यसैले अहिले तत्कालका लागि बेलिब्रिज आवश्यक परेको हो,’ स्रोतले भन्यो।

नेपालले बेलिब्रिजसँगै शव व्यवस्थापनका लागि एक हजारभन्दा बढी शव राख्ने झोलासमेत भारत र चीनसँग माग गरेको स्रोतले जनाएको छ।

Originally published on abcnews.com.np.