काठमाडौं । चीनले नेपाल–चीन सीमा क्षेत्रमा बाढीको जोखिम अझै कायम रहेको भन्दै नेपाललाई आपत्कालीन प्रतिकार्यका लागि आवश्यक तयारी गर्न आग्रह गरेको छ।

काठमाडौंस्थित चिनियाँ दूतावासका प्रवक्ताले शुक्रबार वक्तव्य जारी गर्दै पहिरोजन्य तालमा पानीको सतह उच्च विन्दुमा पुगेको र ओभरफ्लो हुन थालेकाले थप जोखिम बढेको जनाएका छन्।

दूतावासका अनुसार हालैका दिनमा चीन–नेपाल सीमा नदीको माथिल्लो तटीय क्षेत्रमा पर्ने नेपाली भूभागको एक सहायक नदीमा हिम–पहिरो जाँदा नदी थुनिएको थियो। नदी थुनिएपछि सीमा क्षेत्रमा पहिरोजन्य ताल बनेको थियो।

उक्त तालमा पानीको सतह उच्च विन्दुमा पुगेपछि पानी बाहिरिन थालेको र यसले ताल फुट्ने जोखिम बढाएको चिनियाँ दूतावासका प्रवक्ताले बताएका छन्।

“नेपाल र चीन दुवै देशका लागि उद्धार तथा आपत्कालीन प्रतिकार्यका दृष्टिले यो स्थिति हाल निकै संवेदनशील मोडमा छ,” प्रवक्ताले भनेका छन्।

उहाँले पहिरोजन्य तालको तल्लो तटीय क्षेत्रमा रहेका स्थानीय समुदाय तथा सम्बन्धित कर्मचारीलाई नदीको पानीको सतहमा हुने परिवर्तनलाई नजिकबाट नियाल्न, उच्च सतर्कता अपनाउन तथा पूर्वतयारी र आपत्कालीन प्रतिकार्यका लागि आवश्यक व्यवस्था मिलाउन आग्रह गर्नुभएको छ।

चीन र नेपालका सम्बन्धित निकायले अवस्थाको निरन्तर अनुगमन गरिरहेको तथा जोखिमको मूल्यांकन र व्यवस्थापन गरिरहेको दूतावासले जनाएको छ।

चिनियाँ दूतावासले सर्वसाधारणलाई आधिकारिक सूचनामात्र पछ्याउन, पुष्टि नभएका समाचार नफैलाउन र अनावश्यक त्रास सिर्जना नगर्नसमेत आग्रह गरेको छ।

Originally published on abcnews.com.np.