चीनले नेपालमा आपत्कालीन सहायता र अन्तर्राष्ट्रिय उद्धार सहकार्य गर्ने

१२ भदौ, काठमाडौं । चिनियाँ कम्युनिस्ट पार्टी (सीपीसी)ले नेपालमा विपत्तिबाट प्रभावित क्षेत्रमा आपत्कालीन सहायता उपलब्ध गराउने तथा अन्तर्राष्ट्रिय उद्धार सहकार्य अघि बढाउने निर्णय गरेको छ।

राष्ट्रपति सी चिनफिङको अध्यक्षतामा शुक्रबार बसेको सीपीसीको राजनीतिक ब्युरो बैठकले चीनको केरुङ क्षेत्रमा आएको बाढीको अवस्थाबारे समीक्षा गर्दै नेपाललाई आवश्यक सहयोग उपलब्ध गराउने निर्णय गरेको चिनियाँ समाचार संस्था सिन्ह्वाले जनाएको छ।

बैठकमा राष्ट्रपति सीले विनाशकारी पहिरोपछि जारी उद्धार तथा राहत कार्यबारे जानकारी लिनुभएको थियो। उहाँले उद्धार तथा राहत कार्यलाई प्रभावकारी बनाउन आवश्यक व्यवस्था मिलाउन सम्बन्धित निकायलाई निर्देशन दिनुभएको थियो।

बैठकको सुरुवातमा चिनियाँ राष्ट्रपति तथा केन्द्रीय सैन्य आयोगका अध्यक्षसमेत रहनुभएका सी चिनफिङसहित अन्य नेताले बुधबार ग्यिरोङ सीमा नाकामा गएको प्राकृतिक विपत्तिमा परी ज्यान गुमाएकाहरूको सम्झनामा एक मिनेट मौनधारण गर्नुभएको थियो।

सिन्ह्वाका अनुसार पार्टी केन्द्रीय समितिको नेतृत्वमा आपत्कालीन उद्धार कार्य तीव्र, व्यवस्थित र प्रभावकारी समन्वयका साथ अघि बढाइएको छ। प्रभावित नागरिकको पुनःस्थापना तथा विपद्पछिको व्यवस्थापनका लागि पनि प्रयास भइरहेको बैठकमा जानकारी गराइएको थियो।

अत्यधिक चिसो हिमाली क्षेत्रमा विपद् भएकाले उद्धार कार्य चुनौतीपूर्ण रहेको बैठकले जनाएको छ। भिराला उपत्यका, परिवर्तनशील मौसम, आसपासका हिमनदी तथा हिमताल र सम्भावित भौगर्भिक जोखिमका कारण उद्धारमा थप कठिनाइ देखिएको उल्लेख गरिएको छ।

बैठकले सम्बन्धित सबै निकाय तथा विभागलाई उद्धार कार्यमा दृढ र प्रभावकारी कदम चाल्न निर्देशन दिएको छ। साथै, खोज तथा उद्धारका योजना वैज्ञानिक ढंगले तयार पार्दै बेपत्ता भएका चिनियाँ तथा विदेशी नागरिकको खोजी तथा उद्धारका लागि हरसम्भव प्रयास गर्न जोड दिएको छ।

नेपालमा आएको बाढीबाट ठूलो जनधनको क्षति भइरहेका बेला चीनले आपत्कालीन सहायता र अन्तर्राष्ट्रिय उद्धार सहकार्य अघि बढाउने निर्णय गरेको हो।