काठमाडौं । भारतीय राष्ट्रिय कांग्रेसका अध्यक्ष मल्लिकार्जुन खड्गेले नेपालमा भोटेकोशी बाढीका कारण फसेका भारतीय नागरिकको उद्धार तथा सुरक्षित स्थानान्तरणका लागि तत्काल प्रयास तीव्र बनाउन भारतीय प्रधानमन्त्री नरेन्द्र मोदीलाई आग्रह गरेका छन् ।

खड्गेले नेपाल सरकारसँग समन्वय गरी बाढी प्रभावित क्षेत्रमा आवश्यक मानवीय तथा राहत सहायता उपलब्ध गराउन पनि भारत सरकारसँग आग्रह गरेका छन् ।

मोदीलाई लेखेको पत्रमा खड्गेले भारतीय परराष्ट्र मन्त्रालयको पछिल्लो जानकारी उद्धृत गर्दै नेपालमा रहेका ३२० जना भारतीय नागरिकसँग सम्पर्क हुन नसकेको उल्लेख गरेका छन् । सम्पर्कविहीन भारतीय नागरिकको खोजी तथा उद्धारलाई प्राथमिकतामा राखी उनीहरूलाई सुरक्षित रूपमा भारत फर्काउने व्यवस्था गर्न उनले आग्रह गरेका हुन् ।

एनडीआरएफ परिचालनको माग

खड्गेले भारतीय गृहमन्त्री अमित शाहलाई समेत छुट्टै पत्र लेख्दै नेपालमा आवश्यक स्थानमा राष्ट्रिय विपद् प्रतिक्रिया बल (एनडीआरएफ) का टोली परिचालन गर्न आग्रह गरेका छन् ।

प्राकृतिक विपद् व्यवस्थापन तथा खोज तथा उद्धारमा एनडीआरएफसँग रहेको विशेषज्ञता र अनुभव नेपालमा जारी उद्धार अभियानमा उपयोगी हुने खड्गेको भनाइ छ ।

उनले नेपाल सरकारसँग आवश्यक समन्वय गरी उद्धार तथा राहतका लागि जहाँ आवश्यकता छ, त्यहाँ एनडीआरएफका विशेषज्ञ टोली पठाउन आग्रह गरेका छन् ।

‘नेपाललाई मानवीय सहयोग आवश्यक छ’

खड्गेले नेपालमा आएको विनाशकारी बाढीप्रति दुःख व्यक्त गर्दै ठूलो संख्यामा मानिसको मृत्यु र बेपत्ता भएको उल्लेख गरेका छन् । बाढीबाट प्रभावित हजारौँ नागरिकलाई खाद्यान्न, औषधि, आश्रय तथा अन्य अत्यावश्यक सामग्री आवश्यक रहेको उनले बताएका छन् ।

नेपाल र भारतका नागरिकबीच ऐतिहासिक तथा गहिरो सम्बन्ध रहेको उल्लेख गर्दै संकटको समयमा भारतले छिमेकी नेपालको साथमा दृढतापूर्वक उभिनुपर्ने खड्गेको भनाइ छ ।

उनले नेपाल सरकारसँग समन्वय गरी भारतीय नागरिकको उद्धारसँगै बाढी प्रभावित नेपाली नागरिकलाई समेत पर्याप्त मानवीय तथा राहत सहयोग उपलब्ध गराउन भारत सरकारलाई आग्रह गरेका छन् ।

११ सदस्यीय भारतीय टोली नेपालमा

यसैबीच, नेपालमा बाढीपछि उद्धार तथा स्थानीय अधिकारीलाई प्राविधिक सहयोग गर्न भारतबाट ११ सदस्यीय टोली नेपाल आइपुगेको छ ।

भारतीय दूतावास स्रोतका अनुसार नेपाल सरकारको अनुरोधमा आएको उक्त टोलीमा स्वास्थ्यकर्मी तथा सुरुङ उद्धार विशेषज्ञसमेत रहेका छन् ।

विशेषगरी रसुवाका जलविद्युत् आयोजनाका सुरुङ तथा अन्य जोखिमपूर्ण क्षेत्रमा मानिस फसेको आशंकापछि प्राविधिक उद्धार टोलीको आवश्यकता बढेको छ । भारतीय टोलीले नेपाली सुरक्षा निकाय तथा सम्बन्धित निकायसँग समन्वय गरी आवश्यकताअनुसार खोज तथा उद्धार कार्यमा सहयोग गर्ने बताइएको छ ।

भोटेकोशी बाढीपछि नेपालमा विभिन्न देशबाट राहत, उद्धार तथा प्राविधिक सहयोगका प्रस्ताव तथा टोलीहरू आइरहेका छन् । पछिल्लो समय भारतीय सहयोग पनि राहत सामग्रीबाट प्राविधिक उद्धारतर्फ विस्तार हुँदै गएको देखिएको छ ।

Originally published on abcnews.com.np.