काठमाडौँ। भदौ १० गते आएको विनाशकारी बाढीपछि १ सय २२ जना सम्पर्कविहीन रहेको त्रिशूली–३ ‘बी’ जलविद्युत् आयोजनामा उद्धार कार्य जारी छ ।

उद्धारमा संलग्न अधिकारीहरूका अनुसार सुरुङको फ्रन्ट फेसमा ड्रिलिङ गरी हालसम्म चारवटा प्वाल बनाइएको छ । प्राप्त प्रगतिका आधारमा अब फ्रन्ट फेसबाटै सुरुङभित्र प्रवेश गरी खोज तथा उद्धार अघि बढाउने तयारी भइरहेको छ ।

उद्धार कार्यलाई सुरक्षित र प्रभावकारी बनाउन आवश्यक प्राविधिक तयारी तथा सम्बन्धित निकायबीच समन्वय जारी रहेको सरकारले जनाएको छ ।

यसैबीच, भोटेकोसी बाढीबाट प्रभावित जलविद्युत् आयोजनाहरूबाट हालसम्म ३ सय ६१ जनाको जीवितै उद्धार भएको स्वतन्त्र ऊर्जा उत्पादकहरूको संस्था नेपाल (इप्पान)ले जनाएको छ ।

इप्पानका अनुसार २ सय १६ मेगावाट क्षमताको माथिल्लो त्रिशूली–१ आयोजनाबाट २ सय ५४ जना, २० मेगावाटको लाङटाङ आयोजनाबाट १८ जना र ३७ मेगावाटको त्रिशूली–३ ‘बी’ आयोजनाबाट ९१ जनाको उद्धार गरिएको छ ।

तर, रसुवा र नुवाकोटमा बाढीबाट प्रभावित ११ वटा जलविद्युत् आयोजनाबाट अझै ८ सय ९८ जना सम्पर्कविहीन रहेको इप्पानले जनाएको छ ।

रसुवाको माथिल्लो त्रिशूली–१ आयोजनामा सबैभन्दा धेरै ५ सय ७६ जना सम्पर्कविहीन छन् । त्यस्तै रसुवागढी जलविद्युत् आयोजनाबाट ९३ जना, रसुवा–भोटेकोसीबाट चार जना, लाङटाङ खोलाबाट ४२ जना, चिलिमेबाट आठ जना र मेलुङ खोलाबाट सात जना सम्पर्कविहीन रहेको जनाइएको छ ।

नुवाकोटका त्रिशूली र देवीघाट जलविद्युत् आयोजनाबाट एक–एक जना तथा मिडल त्रिशूली गंगाबाट दुई जना सम्पर्कविहीन छन् ।

यसैगरी, माथिल्लो त्रिशूली–३ ‘ए’ मा ४२ जना र त्रिशूली–३ ‘बी’ मा १ सय २२ जना बाढीपछि सम्पर्कविहीन रहेको इप्पानले जनाएको छ ।

उद्धार टोलीले सुरुङभित्र फसेकाहरूको खोजीलाई प्राथमिकतामा राख्दै ड्रिलिङ तथा अन्य प्राविधिक माध्यमबाट पहुँच स्थापित गर्ने प्रयासलाई निरन्तरता दिएको छ।

Originally published on abcnews.com.np.