काठमाडौँ । ब्रुनो फर्नान्डेसको ह्याट्रिक प्रेरित म्यानचेस्टर युनाइटेडले इंग्लिस प्रिमियर लिगमा इप्सविच टाउनमाथि ५–२ को शानदार जित दर्ता गरेको छ।

घरेलु मैदान ओल्ड ट्राफोर्डमा भएको खेलमा युनाइटेडले सुरुवाती अग्रता गुमाए पनि उत्कृष्ट पुनरागमन गर्दै तीन अंक जोडेको हो।

इप्सविचका लागि लिफ डेभिसले २९औँ मिनेटमा उत्कृष्ट गोल गर्दै पाहुना टोलीलाई अग्रता दिलाएका थिए। तर ४०औँ मिनेटमा कर्नरबाट बनेको काउन्टर अट्याकमा म्याथियस कुन्हाको पासलाई फर्नान्डेसले गोलमा परिणत गर्दै युनाइटेडलाई खेलमा फर्काए।

दोस्रो हाफको ५६औँ मिनेटमा ज्याकब ग्रिभ्सको आत्मघाती गोल भएपछि युनाइटेडले २–१ को अग्रता बनायो।

त्यसपछि फर्नान्डेसले ६१औँ मिनेटमा पेनाल्टीमार्फत गोल गर्दै टोलीको अग्रता ३–१ बनाए। ६८औँ मिनेटमा पुनः गोल गर्दै उनले आफ्नो ह्याट्रिक पूरा गरे।

युनाइटेडका लागि पाँचौँ गोल ८२औँ मिनेटमा भएको थियो। त्यसपछि इप्सविचका चुबा अकपोमले इन्ज्युरी समयमा गोल गर्दै अन्तर केही घटाए। खेल ५–२ मै सकियो।

चेल्सीको रोमाञ्चक जित

गएराति नै भएको अर्को खेलमा चेल्सीले ब्राइटन एन्ड होभ एल्बियनलाई ४–३ ले पराजित गरेको छ।

अर्को खेलमा सन्डरल्यान्डले फुलहामलाई १–० ले हराएको छ। यस्तै, लिड्स युनाइटेड र ब्रेन्टफोर्डले १–१ को बराबरी खेल्दै अंक बाँडेका छन्।

Originally published on abcnews.com.np.